ఈడెన్ గార్డెన్స్ వేదికగా నేడు కోల్కతా నైట్ రైడర్స్, దిల్లీ క్యాపిటల్స్ జట్లు తలపడనున్నాయి. ప్రతి మ్యాచ్లో చెలరేగుతూ జట్టుకు విజయాలనందిస్తున్న ఆటగాడు కోల్కతా ఆల్ రౌండర్ ఆండ్రీ రసెల్. తన పదునైన యార్కర్లతో ఎలాంటి బ్యాట్స్మెన్ను అయిన బోల్తా కొట్టించగలడు దిల్లీ జట్టు బౌలర్ రబాడ. వీరి మధ్య పోరు కోసం అభిమానులు ఆసక్తికరంగా వేచి చూస్తున్నారు.
ఈ రెండు జట్లు తలపడిన తొలి మ్యాచ్లో సూపర్ ఓవర్లో విజయం సాధించింది దిల్లీ క్యాపిటల్స్.
సూపర్ ఓవర్లో 11 పరుగులు చేయల్సి ఉండగా మొదటి బంతికే రబాడా.. రసెల్ని క్లీన్ బౌల్డ్ చేశాడు. అద్భుతంగా బౌలింగ్ చేసి దిల్లీకి విజయాన్నందించాడు. ఈ మ్యాచ్లోనూ రబాడ.. రసెల్కు మరోసారి అడ్డుకట్ట వేయాలని దిల్లీ అభిమానులు కోరుకుంటున్నారు.
ఆడిన ఆరింటిలో నాలుగు మ్యాచ్లు గెలిచిన కోల్కతా పాయింట్ల పట్టికలో రెండో స్థానంలో ఉంది. ఐదు మ్యాచ్ల్లో 212 స్ట్రైక్ రేట్తో 257 పరుగులు చేసి నైట్ రైడర్స్ విజయాల్లో కీలక పాత్ర పోషించాడు రసెల్. అందులో 150 పరుగులు సిక్స్ల ద్వారానే వచ్చాయి.
చెన్నై, దిల్లీతో మాత్రమే ఓడిపోయింది కోల్కతా జట్టు. అందులో దిల్లీతో సూపర్ ఓవర్లో పరాజయం పాలైంది. కార్తీక్, నితీష్ రానా, ఊతప్ప, రసెల్లతో బ్యాటింగ్ లైనప్ సమతూకంగా ఉంది. రసెల్ మరోసారి బ్యాట్కు పనిచెప్పాలని కోల్కతా అభిమానులు కోరుతున్నారు.
సీజన్లో నాలుగో విజయాన్ని సాధించి పాయింట్ల పట్టికలో మొదటి నాలుగు స్థానాల్లో నిలవాలని భావిస్తోంది దిల్లీ జట్టు. కోల్కతాపై గత మ్యాచ్లో గెలవడం క్యాపిటల్స్కు కలిసొచ్చే అంశం. పేసర్ రబాడ, ఇషాంత్ శర్మ, క్రిస్ మోరిస్, అక్షర్ పటేల్లతో బౌలింగ్ విభాగం పటిష్ఠంగా ఉంది. బ్యాట్స్మెన్ శిఖర్ ధావన్, పృథ్వీ షా, ఇన్గ్రామ్, శ్రేయస్ అయ్యర్, రిషభ్ పంత్ సత్తా చాటాలని భావిస్తున్నారు.
జట్లు అంచనా..
దిల్లీ క్యాపిటల్స్
శ్రేయస్ అయ్యర్ (కెప్టెన్), ఇషాంత్ శర్మ, పృథ్వీషా, శిఖర్ ధావన్, కొలిన్ ఇన్గ్రామ్, క్రిస్ మోరిస్, అక్షర్ పటేల్, రబాడ, రాహుల్ తెవాతియా, రిషభ్ పంత్, సందీప్ లమిచానే
కోల్కతా నైట్ రైడర్స్
దినేష్ కార్తీక్ (కెప్టెన్), పియూష్ చావ్లా, రాబిన్ ఊతప్ప, సునీల్ నరైన్, హారీ గున్రే, ఆండ్రీ రసెల్, క్రిస్ లిన్, కుల్దీప్ యాదవ్, నితీష్ రానా, ప్రసిద్ధ్ కృష్ణ, శుభమన్ గిల్
