పరస్పర విరుద్ధ ప్రయోజనాల వివాదంలో మరోసారి టీమిండియా కెప్టెన్ విరాట్ కోహ్లీ చిక్కుకున్నాడు. ప్ర‌స్తుతం భారత జట్టు కిట్ స్పాన్సర్గా ఉన్న మొబైల్ ప్రీమియర్ లీగ్ (ఎంపీఎల్) సంస్థలో కోహ్లీ పెట్టుబడులు ఉండ‌ట‌మే ఈ వివాదానికి కారణమైంది.
గతేడాది జ‌న‌వ‌రిలో ఎంపీఎల్‌కు బ్రాండ్ అంబాసిడ‌ర్‌గా కోహ్లీని నియమించారు. అప్పట్లోనే అతని పేరిట రూ.33.32 ల‌క్ష‌ల విలువైన 68 సీసీడీల‌ను కేటాయించారని సమాచారం. వీటిని ప‌దేళ్ల తర్వాత ఈక్విటీ షేర్ల‌లోకి మార్చుకోవ‌చ్చని తెలుస్తోంది. దీంతో ఈ కంపెనీలో కోహ్లీకి 0.051 శాతం వాటా ఉన్న‌ట్లే. ఇదే ఎంపీఎల్ స్పోర్ట్స్‌ను గతేడాది నవంబ‌ర్ 17న అధికారిక కిట్ స్పాన్సర్గా బీసీసీఐ ప్ర‌క‌టించింది.
ఎంపీఎల్ను మూడేళ్ల పాటు బీసీసీఐ అధికారిక కిట్ భాగస్వామిగా ప్రకటించిన తర్వాత.. ఆస్ట్రేలియా పర్యటన నుంచి ఆ సంస్థ లోగో ఉన్న జెర్సీలను టీమ్ఇండియా ఆటగాళ్లు ధరించారు. మూడేళ్ల పాటు ఈ సంస్థ‌తో బీసీసీఐ ఒప్పందం కుదుర్చుకుంది. అయితే ఎంపీఎల్లో కోహ్లీకి వాటా ఉన్నట్లు తెలియదని బీసీసీఐ చెబుతోంది.
కోహ్లీ లాంటి స్టార్ ఆటగాడు.. ఇలాంటి పరస్పర విరుద్ధ ప్రయోజనాలకు పాల్పడడం సరికాదని క్రికెట్ విశ్లేషకులు అభిప్రాయపడుతున్నారు. ఈ విరుద్ధ ప్రయోజనాల అంశాన్ని గతేడాది ఎథిక్స్ అధికారి డీకే జైన్ లేవనెత్తారు. అయితే దీనిపై బీసీసీఐ ఎలా స్పందిస్తుందో చూడాలి.
ఇదీ చూడండి: టెస్టు సిరీస్ క్లీన్స్వీప్.. ర్యాంకింగ్స్లో కివీస్దే అగ్రస్థానం
