టీమ్ఇండియాలో ఉత్తమ కెప్టెన్ ఎవరనే దానిపై ఎప్పటి నుంచో చర్చ జరుగుతూనే ఉంది. ఈ విషయమై ఇప్పటికీ చాలామంది మాజీలు తమ అభిప్రాయాల్ని వెల్లడించారు. ఈ అంశంపై ఇటీవలే మాట్లాడిన మాజీ క్రికెటర్ మనీందర్ సింగ్.. ధోనీ కంటే ముందు కపిల్దేవ్, గంగూలీ కెప్టెన్సీ చేయడం అతడికి దొరికిన అదృష్టమని అన్నాడు.
"టీమ్ఇండియా మాజీ కెప్టెన్లు కపిల్దేవ్, గంగూలీల తర్వాత సారథ్య బాధ్యతలు అందుకున్న ధోనీ ఎంతో అదృష్టవంతుడు. కపిల్దేవ్ 1983లో ప్రపంచకప్ తెచ్చిపెట్టగా, విదేశాల్లో మన జట్టు ఆటతీరు మెరుగయ్యేందుకు దాదా ఎంతగానో కృషి చేశాడు. ఈ రెండు విషయాలు ధోనీ కెప్టెన్సీకి ఎంతగానో ఉపయోగపడ్డాయి. నాకు తెలిసి కపిల్, ధోనీ ఒకేలాంటి పరిస్థితుల్లో ఉన్నారు. ఒకవేళ కపిల్దేవ్ కంటే ముందు ఎవరైనా ప్రపంచకప్ గెలిచి ఉంటే.. అతడు కూడా గొప్ప కెప్టెన్ అయ్యేవాడు"
-మనీందర్ సింగ్, టీమ్ఇండియా మాజీ క్రికెటర్
మరోవైపు సౌరభ్ గంగూలీ గురించి తన అభిప్రాయాలను పంచుకున్నాడు మనీందర్ సింగ్. దాదా కెప్టెన్సీ అంటే తనకు చాలా ఇష్టమని.. ప్రతిభను ఎంపిక చేయడంలో ముందుంటాడని చెప్పాడు. యువరాజ్ సింగ్, హర్భజన్ సింగ్ లాంటి ఆటగాళ్లను దాదా ఎంతగానో ప్రోత్సహించాడని వెల్లడించాడు.
