ఐపీఎల్ 13వ సీజన్ నిర్వహణపై ఇప్పటివరకు స్పష్టత లేదు. మార్చి 29న ప్రారంభంకావాల్సిన ఈ టోర్నీ ఏప్రిల్ 15కు వాయిదాపడింది. కానీ ఆ తేదీనా జరిగే అవకాశం లేకపోయింది. అందుకు కారణం దేశంలో లాక్డౌన్ను ఏప్రిల్ 14 వరకు పొడిగించడమే. అయితే ఈ ఐపీఎల్ అక్టోబర్-నవంబర్లో జరిగే అవకాశముందని వార్తలొస్తున్నాయి. ఈ విషయంపై తాజాగా ఓ బీసీసీఐ అధికారి మాట్లాడారు. ఒకవేళ టీ20 ప్రపంచకప్ వాయిదా పడితే ఐపీఎల్ను అక్టోబర్లో ప్రారంభించే వీలుందని అన్నారు.
"ప్రస్తుత పరిస్థితుల్లో దేశాలన్నీ లాక్డౌన్ విధించాయి. ఆస్ట్రేలియా ఆరు నెలల పాటు అంతర్జాతీయ సరిహద్దుల్ని మూసివేస్తున్నట్లు ప్రకటించింది. బ్రిటన్ కూడా అదే దారిలో వెళ్లేందుకు సిద్ధమవుతోంది. అందువల్ల ఐపీఎల్ను అక్టోబర్-నవంబర్లో నిర్వహిస్తేనే బాగుంటుంది. కానీ ఆ సమయంలో టీ20 ప్రపంచకప్ ఉంది. ఒకవేళ ఐసీసీ ఈ మెగాటోర్నీని వచ్చే ఏడాదికి వాయిదా వేస్తే అప్పుడు ఐపీఎల్ను అక్టోబర్-నవంబర్లో నిర్వహించే అవకాశం ఉంటుంది. కానీ ప్రస్తుతానికి ఐసీసీ చెబుతోన్న ప్రకారం టీ20 ప్రపంచకప్ షెడ్యూల్ ప్రకారమే జరగనుంది."
-బీసీసీఐ అధికారి
ఈ ఏడాది అక్టోబర్ 18 నుంచి నవంబర్ 15 వరకు టీ20 ప్రపంచకప్ జరగనుంది. ఆస్ట్రేలియా వేదికగా జరిగే ఈ టోర్నీ కరోనా కారణంగా వాయిదా పడే అవకాశం ఉందని వార్తలు వస్తున్నాయి. అయితే ఈ మెగాటోర్నీ షెడ్యూల్ ప్రకారమే జరుగుతుందని ఆశిస్తున్నట్లు క్రికెట్ ఆస్ట్రేలియా చీఫ్ కెవిన్ రాబర్ట్స్ తెలిపారు.
