ఫిబ్రవరి 18న చెన్నై వేదికగా జరిగే ఐపీఎల్ వేలంలో మొత్తం 292 మంది ఆటగాళ్లు పాల్గొననున్నారు. వీరిలో 164 మంది భారత ఆటగాళ్లు కాగా 125 మంది విదేశీ ప్లేయర్లు. మరో ముగ్గురు అసోసియేట్ నేషన్స్ క్రీడాకారులు ఉన్నారు.
మొత్తం ఎనిమిది ఫ్రాంచైజీలలో అత్యధికంగా బెంగళూరుకు 13 మంది ఆటగాళ్లను కొనుగోలు చేసే అవకాశం ఉండగా.. సన్రైజర్స్ హైదరాబాద్కు అత్యల్పంగా ముగ్గురిని తీసుకునే ఛాన్స్ ఉంది. అయితే వీరందరిలో గురువారం జరిగే వేలానికి ప్రధాన ఆకర్షణగా ఉన్న బౌలర్లు, ఆల్రౌండర్లు ఎవరో ఓ సారి చూద్దామా..
ఫ్రాంచైజీలు గురిపెట్టే బౌలర్లు..
1. టిమ్ సౌథీ:
ఐసీసీ టీ20 ర్యాంకింగ్స్లో ఏడో స్థానంలో ఉన్న ఈ ఫాస్ట్ బౌలర్.. న్యూజిలాండ్ తరఫున 87 వికెట్లు తీశాడు. ఇటీవల పాకిస్థాన్తో జరిగిన పొట్టి సిరీస్లో తొలి మ్యాచ్లో రెండు వికెట్లు తీయగా.. రెండో టీ20లో నాలుగు వికెట్లతో జట్టు విజయంలో కీలక పాత్ర పోషించాడు. రూ.75 లక్షల బేస్ ప్రైస్తో ఉన్న సౌథీ.. రేపటి వేలంలో అందరిలో ప్రధాన ఆకర్షణగా నిలుస్తానడంలో ఎటువంటి సందేహం లేదు.
2. హర్భజన్ సింగ్:
వ్యక్తిగత కారణాలతో 2020 ఐపీఎల్ సీజన్కు దూరంగా ఉన్న ఈ భారత మాజీ స్పిన్నర్ను.. ఇటీవలే చెన్నై ఫ్రాంచైజీ తమ జట్టు నుంచి తప్పించింది. ఇప్పటివరకు ఐపీఎల్లో 160 మ్యాచ్లాడిన భజ్జీ.. 150 వికెట్లు తీశాడు. రూ.2 కోట్ల బేస్ ప్రైస్తో ఉన్న హర్భజన్ వేలంలో మంచి ధరకు అమ్ముడయ్యే అవకాశం ఉంది.
3. ముజీబ్ ఉర్ రెహ్మాన్:
ఐసీసీ టీ20 ర్యాంకింగ్స్లో 3వ స్థానంలో ఉన్న ఈ అఫ్గాన్ బౌలర్.. రూ.1.5 కోట్ల బేస్ ప్రైస్తో ఉన్నాడు. గతంలో పంజాబ్ జట్టుకు ఆడిన రెహ్మాన్కు.. ఇటీవలే ఆ ఫ్రాంచైజీ ఉద్వాసన పలికింది. అఫ్గాన్ తరఫున 19 టీ20లు ఆడిన ముజీబ్.. 25 వికెట్లు తన ఖాతాలో వేసుకున్నాడు.
4. ఉమేశ్ యాదవ్:
కోటి రూపాయల బేస్ ప్రైస్తో ఉన్న ఉమేశ్.. మొత్తం ఐపీఎల్లో 121 మ్యాచ్లాడి 119 వికెట్లు తీసుకున్నాడు. 2018 సీజన్లో కేవలం 14 టీ20ల్లోనే 20 వికెట్లు తన ఖాతాలో వేసుకున్నాడు. గతంలో ఆర్సీబీ జట్టుకు ఆడిన ఉమేశ్.. ఈ సారి వేలంలో ఎక్కువ మొత్తానికి అమ్ముడయ్యే అవకాశం ఉంది.
5. షెల్డాన్ కాట్రెల్:
ఐసీసీ టీ20 ర్యాంకింగ్స్లో 8వ స్థానంలో ఉన్నాడు ఈ విండీస్ బౌలర్. గతంలో పంజాబ్ జట్టు తరఫున ఆడిన కాట్రెల్.. కోటి రూపాయల బేస్ ప్రైస్తో ఉన్నాడు.
ప్రధాన ఆకర్షణగా నిలిచే ఆల్రౌండర్లు..
1. గ్లెన్ మాక్స్వెల్:
గత సీజన్లో ఘోరంగా విఫలమైన ఈ ఆసీస్ ఆల్రౌండర్ను.. తాజాగా పంజాబ్ ఫ్రాంచైజీ వదులుకుంది. 13వ సీజన్లో 13 మ్యాచ్లాడిన మాక్స్.. కనీసం ఒక్క సిక్సర్ కూడా కొట్టలేకపోయాడు. ఐసీసీ టీ20 ఆల్రౌండర్ల జాబితాలో ప్రస్తుతం మూడో స్థానంలో ఉన్న మాక్స్వెల్.. తనదైన రోజున మ్యాచ్ను ఒంటిచేత్తో గెలిపించగల సత్తా ఉన్న ఆటగాడు అనడంలో ఎటువంటి సందేహం లేదు. ఇటీవల జరిగిన బిగ్బాష్ లీగ్తో తిరిగి ఫామ్ను అందిపుచ్చుకున్న ఈ ఆల్రౌండర్ తాజా వేలంలో రూ.2 కోట్ల బేస్ ప్రైస్తో ఉన్నాడు.
2. క్రిస్ మోరిస్:
బంతితోను, బ్యాట్తోనూ సత్తా చాటే ఈ సౌతాఫ్రికా ప్లేయర్.. ప్రస్తుతం రూ.75 లక్షల విలువ జాబితాలో ఉన్నాడు. గత సీజన్లో ఆర్సీబీ జట్టుకు ఆడిన క్రిస్.. 9 మ్యాచ్లాడి 11 వికెట్లు దక్కించుకున్నాడు. అయితే ఆ సీజన్లో బ్యాటింగ్లో తగిన అవకాశాలు రాలేదు. దీంతో కేవలం 24 రన్స్ మాత్రమే చేశాడు.
3. షకిబుల్ హసన్:
ఐసీసీ వన్డే ఆల్రౌండర్ల జాబితాలో తొలి స్థానంతో పాటు టీ20 ఆల్రౌండర్ల లిస్టులో మూడో స్థానంలో ఉన్నాడు షకిబ్. రూ.2 కోట్ల విలువ జాబితాలో ఉన్న ఈ బంగ్లాదేశ్ క్రికెటర్.. పరిస్థితులకు తగ్గట్లు బౌలింగ్ చేయగలడు. అటు బ్యాటుతోనూ తనదైన శైలిలో రెచ్చిపోయే షకిబ్.. జట్టుకు ఉపయుక్తమైన పరుగులు సాధించగలడు.
4. మొయిన్ అలీ:
ఆర్సీబీ తరఫున 13వ సీజన్ ఆడిన ఈ స్పిన్ ఆల్రౌండర్.. ప్రస్తుతం రూ.2 కోట్ల బేస్ ప్రైస్ జాబితాలో ఉన్నాడు. ఇంగ్లాండ్ జట్టులో 140 పరిమిత ఓవర్ల క్రికెట్ మ్యాచ్లు ఆడిన అనుభవం అలీ సొంతం. ఇటీవల భారత్తో టెస్టు మ్యాచ్లో 8 వికెట్లు సాధించి తన సత్తా ఎంటో నిరూపించాడు.
5. షారుక్ ఖాన్:
ఇటీవల సయ్యద్ ముస్తాక్ అలీ టోర్నీ ద్వారా వెలుగులోకి వచ్చాడు ఈ తమిళనాడు ఆల్రౌండర్. క్వార్టర్ ఫైనల్లో 19 బంతుల్లోనే 40 పరుగులు చేసి జట్టును గెలిపించాడు. బ్యాటింగ్తో పాటు పేస్ బౌలింగ్ కూడా చేయగల షారుక్.. రూ.20 లక్షల బేస్ ప్రైస్ లిస్టులో ఉన్నాడు. ఇప్పటివరకు 31 టీ20లు ఆడిన ఈ ఆటగాడు 293 పరుగులు సాధించాడు.
ఇదీ చదవండి: తొలి టీ20 మ్యాచ్ ఆడింది ఈరోజే
