ఐపీఎల్లో మరోసారి కరోనా కలకలం సృష్టించింది. లీగ్ కోసం దుబాయ్ వెళ్లిన బీసీసీఐ వైద్యబృందంలో ఓ వ్యక్తికి వైరస్ సోకింది. ఈ విషయాన్ని బోర్డు ధ్రువీకరించింది. దీనితోపాటే బెంగళూరులోని జాతీయ క్రికెట్ అకాడమీలోనూ ఇద్దరికి పాజిటివ్గా తేలినట్లు వెల్లడించింది. వారి పేర్లను మాత్రం బహిర్గతపరచలేదు.
"బీసీసీఐ వైద్యబృందంలోని వ్యక్తికి కరోనా వచ్చింది వాస్తవమే. ప్రస్తుతం ఆయన ఐసోలేషన్లో ఉన్నారు. తర్వాతి టెస్ట్కు కోలుకుంటారని అనుకుంటున్నాం. ఎన్సీఏలో పాజిటివ్ వచ్చిన ఇద్దరిని ఐసోలేషన్లో ఉంచాం" -భారత క్రికెట్ బోర్డు
అంతకుముందు ఆగస్టు 29న, అన్ని ఫ్రాంఛైజీలకు చేసిన వైద్యపరీక్షల్లో 13 మంది కరోనా పాజిటివ్గా తేలిందని బీసీసీఐ ప్రకటించింది. ఇందులో ఇద్దరు క్రికెటర్లు ఉన్నట్లు చెప్పింది. వారందరిని వైద్యుల పర్యవేక్షణలో ఉంచినట్లు వెల్లడించింది.
ప్రస్తుత సీజన్ సెప్టెంబరు 19 నుంచి నవంబరు 10 వరకు జరగనుంది. దుబాయ్, అబుదాబీ, షార్జా మైదానాలు ఇందుకు ఆతిథ్యమివ్వనున్నాయి.
