ప్రపంచంలో ఉన్న పలు దేశాల క్రికెట్ బోర్డుల్లో బీసీసీఐకి ప్రత్యేక స్థానం ఉంది. ధనిక, క్యాష్ రిచ్ లీగ్ ఐపీఎల్ నిర్వహించే బోర్డుగా మంచి పేరుంది. అలాంటిది 27 మంది జట్టు ఆటగాళ్లకు గతేడాది అక్టోబర్ నుంచి జీతాలు చెల్లించట్లేదట. త్రైమాసికానికి ఒకసారి వాళ్లకు ఇచ్చే చెల్లింపులన్నీ ప్రస్తుతం ఆగిపోయినట్లు ఓ మీడియా నివేదిక ద్వారా వెల్లడైంది.
స్టార్ ఆటగాళ్లకు
అక్టోబర్ నుంచి భారత క్రికెటర్లు.. మొత్తం రెండు టెస్టులు, తొమ్మిది వన్డేలు, ఎనిమిది టీ20లు ఆడారు. ఫలితంగా ప్లేయర్లకు రూ.99 కోట్లు చెల్లించాల్సి ఉన్నా.. ఇప్పటికీ వాటిని ఇవ్వలేదని సమాచారం.
గ్రేడ్ ఏ+ క్యాటగిరీలో కెప్టెన్ కోహ్లీ, రోహిత్ శర్మ, జస్ప్రీత్ బుమ్రా ఉన్నారు. వీళ్లకు ప్రతి ఏటా రూ.7 కోట్లు ఇవ్వాల్సి ఉంటుంది. గ్రేడ్ ఏ ప్లేయర్లకు రూ.5 కోట్ల చొప్పున, గ్రేడ్ బీ ఆటగాళ్లకు రూ.3 కోట్లు, గ్రేడ్ సీలో ఉన్న వాళ్లకు రూ.1 కోటి చొప్పున బోర్డు చెల్లిస్తుంది.
టెస్టుకు రూ.15 లక్షలు, వన్డేకు రూ.6 లక్షలు, టీ20 మ్యాచ్కు రూ.3లక్షల మ్యాచ్ ఫీజు ఉంటుంది. 2018 మార్చి నాటికి బీసీసీఐ బ్యాంక్లో రూ. 5,526 కోట్లు ఉన్నట్లు తెలుస్తోంది. ఇందులో రూ.2,992 కోట్లు ఫిక్స్డ్ డిపాజిట్గా ఉన్నాయి. 2018 ఏప్రిల్ నుంచి బీసీసీఐకి రూ.6,138 కోట్లను ఇన్స్టాల్మెంట్ల రూపంలో చెల్లించింది ప్రసారదారు సంస్థ. అయితే ఇంత ఆదాయం ఉన్న జీతాలు చెల్లించకపోవడం చర్చనీయాంశంగా మారింది.
ఝార్ఖండ్, ముంబయి, బంగాల్, జమ్ము కశ్మీర్, పుదుచ్చేరి, బరోడా, రైల్వేస్, రాజస్థాన్, ఉత్తరప్రదేశ్,చత్తీస్గఢ్కు చెందిన దేశవాళీ ఆటగాళ్ల ఫీజులు కూడా ఇప్పటికీ చెల్లించలేదట.
ఇదే కారణమా?
ఆటగాళ్లకు జీతాలు చెల్లించకపోవడానికి చీఫ్ ఫైనాన్సిల్ ఆఫీసర్ పదవి డిసెంబర్ నుంచి ఖాళీగా ఉండటమే కారణంగా తెలుస్తోంది. కీలక పదవులైన చీఫ్ ఎగ్జిక్యూటివ్ ఆఫీసర్, జనరల్ మేనేజర్(క్రికెట్ వ్యవహారాలు) పోస్టులు కూడా జులై నుంచి ఖాళీగానే ఉన్నాయి.
బీసీసీఐ అధ్యక్షుడిగా సౌరభ్ గంగూలీ, సెక్రటరీ జై షా పదవీ కాలం ఇటీవలే పూర్తయింది. లోథా కమిటీ నిబంధనల ప్రకారం వారు తమ బాధ్యతల నుంచి తప్పుకోవాల్సి ఉంది. అయితే బీసీసీఐ రాజ్యంగం మార్పు కోసం సుప్రీం కోర్టును ఆశ్రయించింది బోర్డు. కూలింగ్ పీరియడ్ను తొలగిస్తే గంగూలీ, జై షా.. ఆయా పదవుల్లో కొనసాగే అవకాశం ఉంది. ఈ సమస్యలన్నీ చక్కబడ్డాక దాదా యాజమాన్యం వీటన్నింటిపై దృష్టిపెట్టొచ్చని తెలుస్తోంది.
ఆగస్టు 2న ఐపీఎల్ గవర్నింగ్ కౌన్సిల్.. మెగాటోర్నీ 13వ సీజన్ నిర్వహణ, షెడ్యూల్పై నిర్ణయం తీసుకోనుంది. అక్టోబర్-నవంబర్ మధ్య యూఏఈ వేదికగా జరగనున్న టోర్నీ ఏర్పాట్లపైనా సమీక్షించనుంది.
