ఆస్ట్రేలియాపై టీమిండియా ప్రతీకారం తీర్చుకుంది. తొలిమ్యాచ్లో ఓటమికి బదులుగా రెండో వన్డేలో అద్భుత విజయం సాధించింది. భారత్ నిర్దేశించిన 341 పరుగుల లక్ష్యాన్ని ఛేదించే క్రమంలో ఆసీస్ 49.1 ఓవర్లలో 304 పరుగులకు ఆలౌటైంది. జట్టు మొత్తం సమష్టిగా రాణించి, ఆసీస్పై 36 పరుగుల తేడాతో గెలిచింది. ముందు బ్యాట్స్మెన్ రాణిస్తే, ఆ తర్వాత బౌలర్లు కంగారూల పని పట్టారు.
టాస్ ఓడి బ్యాటింగ్కు దిగిన భారత్కు.. ఓపెనర్లు శుభారంభమిచ్చారు. తొలి వికెట్కు 81 పరుగులు జోడించారు. ఈ క్రమంలో 42 పరుగులు చేసి రోహిత్ ఔటయ్యాడు. తర్వాత ధాటిగా ఆడిన ధావన్.. ప్రత్యర్థి బౌలర్లను ఎదుర్కొని, సెంచరీకి చేరువయ్యాడు. అయితే 96 పరుగుల వ్యక్తిగత స్కోరు వద్ద జంపా బౌలింగ్లో ఎల్బీడబ్ల్యూగా వెనుదిరిగాడు.
కాసేపటికే అయ్యర్ ఔటవగా.. మరో వికెట్ పడకుండా జాగ్రత్తగా ఆడారు కోహ్లీ-రాహుల్. వేగంగా ఆడే ప్రయత్నంలో జంపా బౌలింగ్లో క్యాచ్ ఇచ్చి పెవిలియన్ చేరాడు విరాట్. చివర్లో రాహుల్ వీరవిహారం సృష్టించాడు. ఫోర్లు, సిక్సర్లతో ఆసీస్ బౌలర్లపై విరుచుకుపడి, 80 పరుగులు చేశాడు. మొత్తంగా నిర్ణీత ఓవర్లలో 6 వికెట్ల నష్టానికి 340 పరుగులు చేసింది భారత్. ఆసీస్ బౌలర్లలో జంపా 3, రిచర్డ్సన్ 2 వికెట్లు తీశారు.
అనంతరం ఛేదన ప్రారంభించిన ఆసీస్.. నెమ్మదిగా ఇన్నింగ్స్ మొదలుపెట్టింది. త్వరగానే వార్నర్(15) వికెట్ పోగుట్టుకుంది. తర్వాత కాసేపటికే ఫించ్ 33 పరుగులు చేసి ఔటయ్యాడు. ఆ తర్వాత క్రీజులోకి వచ్చిన స్మిత్-లబుషేన్ మూడో వికెట్కు 96 పరుగుల భాగస్వామ్యం నెలకొల్పారు.
ఈ క్రమంలో స్మిత్(98), లబుషేన్(46) కొద్దిలో సెంచరీ, అర్ధ సెంచరీలు మిస్ చేసుకున్నారు. మిగతా వారిలో ఎవరూ ఎక్కువసేపు క్రీజులో నిలబడలేకపోయారు. భారత బౌలర్ల ధాటికి తక్కువ పరుగులకే పెవిలియన్ చేరారు. టీమిండియా బౌలింగ్లో షమి 3.. సైనీ, జడేజా, కుల్దీప్ తలో 2 వికెట్లు పడగొడితే, బుమ్రా ఓ వికెట్ తీశాడు.
ఇవీ చదవండి:
