సొంతగడ్డపై ఇంగ్లాండ్తో టెస్టు సిరీస్ గెలిచి ఊపుమీద కనిపించిన టీమ్ఇండియా.. టీ20ల్లో మాత్రం ఆధిక్యాన్ని ప్రదర్శించలేకపోతుంది. ఐదు మ్యాచ్ల పొట్టి సిరీస్లో ఇప్పటికే మూడు మ్యాచ్లు ముగిశాయి. ఇంగ్లాండ్ 2-1 ఆధిక్యంలోకి దూసుకెళ్లింది. తదుపరి మ్యాచ్లో ఎలాగైనా గెలిచి సిరీస్ ఆశలు సజీవంగా నిలుపుకోవాలని ఆతిథ్య భారత్ యోచిస్తోంది. మరో వైపు మోర్గాన్ సేన కూడా నాల్గో టీ20ని నెగ్గి సిరీస్ను కైవసం చేసుకోవాలని భావిస్తోంది. టాస్ కీలక పాత్ర పోషిస్తున్న మొతేరా పిచ్పై భారత్ ఆల్రౌండ్ ప్రదర్శన చేస్తేనే తదుపరి మ్యాచ్ గెలిచే అవకాశం ఉంది.
కలవరపెడుతున్న ఓపెనింగ్..
టీమ్ఇండియా ఓపెనర్ కేఎల్ రాహుల్ ఫామ్ భారత్ను కలవరపరుస్తోంది. తొలి మ్యాచ్లో కేవలం ఒక్క పరుగుకే పెవిలియన్ చేరిన రాహుల్.. మిగతా రెండు టీ20ల్లో డకౌట్గా వెనుదిరిగాడు. అయినప్పటికీ.. తదుపరి మ్యాచ్లకు కూడా రాహుల్ను పక్కన పెట్టేది లేదని కెప్టెన్ కోహ్లీతో పాటు, బ్యాటింగ్ కోచ్ విక్రమ్ రాఠోడ్ అతనికి మద్దతుగా నిలుస్తున్నారు. టీ20 ప్రపంచకప్ నేపథ్యంలో రోహిత్-రాహుల్ జోడీనే తమ మొదటి ప్రాధాన్యం అని విరాట్ ఇప్పటికే స్పష్టం చేశాడు. వరుస వైఫల్యాలు ఉన్నప్పటికీ.. ఒక్క ఇన్నింగ్స్తో రాహుల్ తిరిగి గాడిలో పడతాడని రాఠోడ్ ఆశాభావం వ్యక్తం చేశాడు. ఒకవేళ రాహుల్కు విశ్రాంతినిచ్చిన అతని స్థానాన్ని సూర్యకుమార్ యాదవ్తో భర్తీ చేయొచ్చు. అరంగేట్రంలోనే అర్ధ సెంచరీతో అదరగొట్టిన ఇషాన్ కిషన్.. రోహిత్తో కలిసి ఇన్నింగ్స్ను ప్రారంభించే అవకాశాలూ ఉన్నాయి.
రెండుసార్లు తొలుత బ్యాటింగ్ చేసిన టీమ్ఇండియా పవర్ ప్లే ఓవర్లలో పరుగులు చేయడానికి ఇబ్బంది పడింది. ఆర్చర్, మార్క్ ఉడ్ బౌలింగ్ను ఎదుర్కోలేక త్వరగా వికెట్లు కోల్పోయింది. రిషభ్ పంత్ సుడిగాలి ఇన్నింగ్స్ ఆడుతున్నా.. వాటిని భారీ స్కోర్లుగా మలవలేకపోతున్నాడు. బ్యాట్స్మెన్ రాణిస్తున్నప్పటికీ.. పెద్ద లక్ష్యాలను ప్రత్యర్థి ముందు ఉంచలేకపోతుంది కోహ్లీ సేన.
బౌలర్లు రాణించాలి..
గాయం నుంచి కోలుకుని జట్టులోకి వచ్చిన ప్రధాన పేసర్ భువనేశ్వర్ కుమార్ అంతగా ఆకట్టుకోలేకపోతున్నాడు. బ్యాట్స్మెన్కు కళ్లెం వేయలేక పోతున్నాడు. స్పిన్ మాయజాలంతో ప్రత్యర్థి బ్యాట్స్మెన్ను ముప్పుతిప్పలు పెట్టే యుజ్వేంద్ర చాహల్ వికెట్లు తీయకపోగా.. భారీగా పరుగులు సమర్పించుకుంటున్నాడు. ఇప్పటికే హర్దిక్, సుందర్ ఉన్నప్పటికీ.. మరో ఆల్రౌండర్ను తుది జట్టులోకి తీసుకోవాలని భారత్ భావిస్తోంది. అదే కనుక చేస్తే రాహుల్ తెవాతియాకు అరంగేట్రం చేసే అవకాశం దక్కొచ్చు. లోకల్ బాయ్ అక్షర్ పటేల్కు అవకాశం లేకపోలేదు. బ్యాటింగ్ విభాగంలో కోహ్లీ, ఇషాన్ కిషన్, శ్రేయస్‌ అయ్యర్‌, రిషబ్‌ పంత్ ఫామ్‌లో ఉండటం జట్టుకు కలిసి వచ్చే అంశం. సిరీస్లో 1-2తో వెనుకబడినప్పటికీ నాలుగో మ్యాచ్ కోసం భారత జట్టులో భారీ మార్పులేమీ ఉండకపోవచ్చు.
టాస్ గెలిస్తేనే..
ఏదేమైనా టాస్ కీలక పాత్ర పోషిస్తున్న మొతేరా పిచ్పై టాస్ నెగ్గిన జట్టు ఫీల్డింగ్ ఎంచుకుంటుందనడంలో ఎటువంటి సందేహం లేదు. మూడు మ్యాచ్ల్లో రెండు సార్లు టాస్ ఓడిన కోహ్లీ.. ఈ మ్యాచ్లో టాస్ గెలవడం ముఖ్యం. మ్యాచ్ ఆసాంతం పిచ్ భిన్నంగా స్పందిస్తోంది. తొలుత బౌలింగ్ చేసే జట్టుకు పేస్ అనుకూలిస్తూనే.. ఛేదనలో బ్యాటింగ్కు సహకరిస్తుంది.
పట్టుదలతో ఇంగ్లాండ్..
నాల్గో టీ20లో నెగ్గి సిరీస్ను చేజిక్కించుకోవాలని మోర్గాన్ సేన పట్టుదలతో ఉంది. ఓపెనర్లు బట్లర్‌, రాయ్‌లతో పాటు బెయిర్‌స్టో అద్భుత ఫామ్‌లో ఉండటం ఇంగ్లాండ్కు కలిసొస్తుంది. పొట్టి ఫార్మాట్లో నంబర్‌ వన్ బ్యాట్స్‌మన్‌ డేవిడ్‌ మలన్‌ అంచనాలు అందుకోలేకపోవడం ఆ జట్టును ఇబ్బంది పెడుతోంది. బౌలింగ్ విభాగంలో మార్క్‌వుడ్‌, ఆర్చర్, సామ్‌ కరన్‌ అంచనాల మేరకు రాణిస్తుండటం ఇంగ్లిష్‌ జట్టుకు సానుకూలాంశం. గురువారం రాత్రి 7 గంటలకు మ్యాచ్ ప్రారంభం కానుంది.
ఇదీ చదవండి: మణికట్టు మాయాజాలమేది యూజీ?
