వచ్చే ఏడాది ప్రపంచ టెస్టు ఛాంపియన్షిప్ ఫైనల్ జరగనున్న నేపథ్యంలో ప్రస్తుతం జరుగుతున్న మ్యాచ్లు మరింత రసవత్తరంగా మారాయి. తొలి రెండు స్థానాల కోసం జట్లు హోరాహోరీగా తలపడుతున్నాయి. అయితే తుదిపోరుకు అర్హత సాధించాలంటే రాబోయే మ్యాచ్లు కోహ్లీసేనకు ఎంతో కీలకం. తొలి రెండు స్థానాల కోసం ఆస్ట్రేలియా, న్యూజిలాండ్, భారత్ మధ్యో పోటీ తీవ్రంగా ఉండటమే ఇందుకు కారణం.
స్వల్ప ఆధిక్యంలో ఆసీస్
ఐసీసీ టెస్టు ర్యాంకింగ్స్లో టీమ్ఇండియా(114 పాయింట్లు) మూడో స్థానంలో ఉంది. ఆస్ట్రేలియా(116.46) అగ్రస్థానంలో.. ఆ తర్వాత న్యూజిలాండ్ (116.37) ఉంది. ఇటీవలే వెస్టిండీస్తో జరిగిన టెస్టు సిరీస్లో కివీస్ జట్టు విజయం సాధించి, టేబుల్లో రెండో స్థానంలోని టీమ్ఇండియాను వెనక్కి నెట్టి ఆ ప్లేస్కు చేరింది.
కివీస్కు ఛాన్స్
ఈనెల 26 నుంచి పాకిస్థాన్, న్యూజిలాండ్ మధ్య టెస్టు సిరీస్ మొదలు కానుంది. ఇందులో 2-0 తేడాతో కివీస్ గెలిస్తే ర్యాంకింగ్స్లో ఆ జట్టు అగ్రస్థానానికి చేరుతుంది. మరోవైపు టీమ్ఇండియా ఈ జాబితాలో టాప్లోకి వెళ్లాలంటే రాబోయే ఎనిమిది టెస్టుల్లో ఐదు లేదా నాలుగు విజయాలతో పాటు మూడింటిలో డ్రా కావాలి.
ఏదైనా జరగొచ్చు!
"ఆస్ట్రేలియా, భారత్ సిరీస్తో పాటు.. న్యూజిలాండ్, పాకిస్థాన్ సిరీస్ను బట్టి ర్యాంకులు తారుమారు కానున్నాయి. అయితే ఈ పోటీలో ఆస్ట్రేలియా అగ్రస్థానాన్ని నిలుపుకోవచ్చు లేదా న్యూజిలాండ్ టాప్నకు చేరొచ్చు" అని ఐసీసీ ఓ ప్రకటనలో తెలిపింది.
కరోనా కారణంగా ప్రపంచ టెస్టు ఛాంపియన్షిప్ కోసం గతంలో పాయింట్ల పద్ధతిని పక్కన పెట్టి.. ర్యాంకులను, విజయాల శాతం ఆధారంగా నిర్ణయిస్తూ ఇటీవలే అనూహ్య నిర్ణయం తీసుకుంది ఐసీసీ. దీని వల్ల భారత్ పాయింట్లు ఎక్కువ ఉన్నప్పటికీ అప్పుడు పట్టికలో రెండో స్థానానికి పడిపోయింది.
ఇదీ చూడండి: పంత్కు నిరాశ.. గులాబీ టెస్టులో దక్కని చోటు
