అహ్మదాబాద్ వేదికగా జరుగుతున్న డే/నైట్ టెస్టు తొలి రోజు ఆట ముగిసే సమయానికి భారత్ తొలి ఇన్నింగ్స్లో 3 వికెట్ల నష్టానికి 99 పరుగులు చేసింది. క్రీజులో రోహిత్ శర్మ(57), అజింక్య రహానె(1) ఉన్నారు. ఇంగ్లాండ్ బౌలర్లలో లీచ్ 2 వికెట్లు తీసుకున్నాడు. తొలి ఇన్నింగ్స్ ఆధిక్యానికి భారత్.. 14 పరుగుల దూరంలో ఉంది.
అంతకుముందు ఇంగ్లాండ్ తొలి ఇన్నింగ్స్లో 112 పరుగులకే ఆలౌటైంది. హోంగ్రౌండ్లో అక్షర్ 6 వికెట్లతో చెలరేగగా.. అశ్విన్ 3 వికెట్లు తీసుకున్నాడు.
భోజన విరామ సమయానికి 5/0తో ఉన్న టీమ్ఇండియా 33 పరుగుల వద్ద తొలి వికెట్ కోల్పోయింది. ఓపెనర్ శుభ్మన్ గిల్.. ఆర్చర్ బౌలింగ్లో వెనుదిరిగాడు. అనంతరం క్రీజులోకి వచ్చిన ఛెతేశ్వర్ పుజారా నిరాశపర్చాడు. లీచ్ బౌలింగ్లో డకౌట్గా పెవిలియన్ చేరాడు. తర్వాత బ్యాటింగ్కు వచ్చిన కెప్టెన్ కోహ్లీ.. రోహిత్కు చక్కని సహకారం అందించాడు. ఎడాపెడా బౌండరీలు బాదిన హిట్మ్యాన్ 63 బంతుల్లో హాఫ్సెంచరీకి చేరుకున్నాడు. టెస్టుల్లో అతడికిది 12వ అర్ధసెంచరీ.
అయితే.. మరో 5 నిమిషాల్లో మ్యాచ్ ముగుస్తుందనగా జాక్ లీచ్ బౌలింగ్లో విరాట్ బౌల్డయ్యాడు. మూడో వికెట్కు ఈ జంట 64 పరుగుల భాగస్వామ్యం నమోదు చేసింది.
రోహిత్, రహానె మరో వికెట్ పడకుండా జాగ్రత్తపడ్డారు.
ఇదీ చదవండి: 'ఇప్పుడెలా ఉంది కెవిన్ భయ్యా'
