టీమ్ఇండియాతో రెండో వన్డేలో అద్భుత ప్రదర్శన చేసిన బెన్ స్టోక్స్పై ప్రశంసలు కురిపించాడు ఇంగ్లాండ్ తాత్కాలిక కెప్టెన్ జోస్ బట్లర్. స్టోక్స్ గత కొద్ది కాలంగా అతడు బౌలర్లపై విరుచుకుపడుతున్నాడని చెప్పాడు.
"రెండో వన్డేలో స్టోక్స్ ఆట చాలా బాగుంది. అతడి బ్యాటింగ్ను ఎంజాయ్ చేశాను. బెన్ ప్రపంచకప్ ఫైనల్ ఇన్నింగ్స్ ప్రత్యేకమైనది. ఆ ఇన్నింగ్స్ను నేను ఆస్వాదించాను. బెన్ ప్రతిభ మనందరికీ తెలుసు. గత కొన్నేళ్లుగా అతడి ఆటను గమనిస్తున్నా. బ్యాటింగ్లో చాలా మార్పు వచ్చింది. అన్ని ఫార్మాట్లలో అత్యుత్తమ ఆటతీరు కనబరుస్తున్నాడు. అతనికి బౌలింగ్ చేయాలంటే బౌలర్లు భయపడుతున్నారు. ఇదే ఆట ఐపీఎల్లోనూ కొనసాగుతుందని ఆశిస్తున్నా."
-జోస్ బట్లర్, ఇంగ్లాండ్ తాత్కాలిక కెప్టెన్.
టీ20ల్లో స్టోక్స్ బ్యాటింగ్ ఆర్డర్పై స్పందించాడు బట్లర్. "అవును రెండో వన్డేలో మూడో స్థానంలో బ్యాటింగ్కు వచ్చిన బెన్ అదరగొట్టాడు. ఈ స్థానంలో వచ్చిన క్రికెటర్లంతా దాదాపు అవకాశాలు అందిపుచ్చుకున్నారు. టీ20ల్లో ఈ స్థానంలో డేవిడ్ మలన్ ఉన్నాడు. పొట్టి ఫార్మాట్లో అతడు నంబర్ వన్ బ్యాట్స్మెన్ అనడంలో సందేహమే లేదు" అని బట్లర్ చెప్పుకొచ్చాడు.
ఐపీఎల్ స్క్వాడ్తో చేరడంపై స్పష్టత..
ఐపీఎల్ 14వ సీజన్ కోసం ముంబయికి చేరింది రాజస్థాన్ రాయల్స్ జట్టు. టీమ్ఇండియాతో వన్డే సిరీస్ ఆదివారంతో ముగుస్తుంది. సోమవారం నుంచి రాయల్స్ స్క్వాడ్తో చేరుతానని స్పష్టం చేశాడు బట్లర్. ఈ ఏడాది భారత్ వేదికగా పొట్టి ప్రపంచకప్ ఉన్న నేపథ్యంలో.. ప్రస్తుత ఐపీఎల్కు ఎంతో ప్రాముఖ్యత ఉందని అతడు వెల్లడించాడు. గతంలో ఎన్నో లీగ్లు ఆడినప్పటికీ.. ప్రస్తుత టోర్నీ చాలా విలువైనదని తేల్చి చెప్పాడు.
ఇదీ చదవండి: ఆర్చర్ మోచేతికి సర్జరీ.. ఈసీబీ స్పష్టం
