గతంలో టీమ్ఇండియా మ్యాచ్లు జరిగినప్పుడు తనతోపాటు స్పిన్నర్ చాహల్కు మాజీ కెప్టెన్ ధోనీ చాలా సహకరించాడని కుల్దీప్ యాదవ్ చెప్పాడు. బౌలింగ్ చేసేటప్పుడు చాలాసార్లు మహీనే ఫీల్డింగ్ సెట్ చేసేవాడని తెలిపాడు. తనపై ఉన్న ఒత్తిడిని చాలావరకు తగ్గించేవాడని అన్నాడు. ఇటీవలే ఓ ఇంటర్వ్యూలో ఈ విషయాల్ని వెల్లడించాడు
"ధోనీతో నేను ఆడినప్పుడల్లా కోచ్ లేడనే విషయం తెలిసేది కాదు. ఎందుకంటే మహీ నాకు చాలా సలహాలు ఇస్తాడు. బంతిని స్పిన్ చేయడంపైనే ఎప్పుడూ దృష్టి పెట్టమని చెబుతుండేవాడు. కొన్నిసార్లు మమ్మల్ని బౌలింగ్పై మాత్రమే దృష్టి పెట్టమని చెప్పి, తనే ఫీల్డింగ్ సర్దేవాడు. మ్యాచ్ ప్రారంభానికి ముందు ఆటలో ఏం చేయాలో కొన్ని సూచనలు చెప్పేవాడు. సీనియర్ ఆటగాడిగా నాకు, చాహల్కు చాలా మద్దతుగా నిలిచి మమ్మల్ని వెన్నుతట్టాడు. కెప్టెన్ కోహ్లీ కూడా మాకు అండగా నిలుస్తున్నాడు"
-కుల్దీప్ యాదవ్, టీమ్ఇండియా స్పిన్నర్
దీనితోపాటే తన తొలి టెస్టులో అనిల్ కుంబ్లే ఇచ్చిన సలహాలను గుర్తుచేసుకున్నాడు కుల్దీప్. "నేను ఆడే తొలిటెస్టుకు ముందు రోజు, ఐదు వికెట్లు తీయాలని భోజన సమయంలో కుంబ్లే చెప్పాడు. నేను కొన్ని క్షణాలు స్పందించలేదు. కానీ, కచ్చితంగా చేస్తానని ఆయనతో చెప్పాను" అని చెప్పినట్లు వెల్లడించాడు.
