భారత్లో క్రికెట్కు ఉన్న ఆదరణ మరే దేశంలోనూ ఉండదు. అందువల్లే దేశ క్రికెట్ బోర్డు ప్రపంచంలోనే అత్యంత ధనిక బోర్డుగా విరాజిల్లుతోంది. మన ఆటగాళ్ల జీతాలు మిగిలిన దేశ క్రికెటర్లతో పోలిస్తే చాలా ఎక్కువే. ఈ బ్యాట్, బంతి ఆటకున్న క్రేజ్ ఇండియాలో మరే క్రీడకు లేదు. అందుకే మన క్రికెటర్లు ఫోర్బ్స్ జాబితాల్లో టాప్లో నిలుస్తున్నారు. అయితే మళ్లీ పురుషుల క్రికెట్కు ఉన్నంత విలువ మహిళా క్రికెట్కు లేదనే చెప్పొచ్చు. ఇక బ్యాడ్మింటన్, టెన్నిస్, హాకీల్లో అంతర్జాతీయ స్థాయిలో పతకాలు తెచ్చిన వారికి మాత్రమే ఎంతోకొంత గుర్తింపు ఉంటుంది. మరి దివ్యాంగ క్రికెటర్ల పరిస్థితేంటి. వీరి ఆటను ఎవరు చూస్తారు. వీరి జీతాలు ఎంత. ఇప్పుడు మాజీ టీమ్ఇండియా కెప్టెన్ దినేశ్ సైన్ పరిస్థితి చూస్తే మీకే అర్థమవతుంది.
పేరు దినేశ్ సైన్. చిన్నప్పుడే పోలియో బారిన పడ్డాడు. ఎలాగోలా కష్టపడి భారత జట్టులో స్థానం సంపాదించాడు. 2015-19 కాలంలో టీమ్ఇండియాకు ప్రాతినిధ్యం వహించాడు. జట్టుకు కెప్టెన్ బాధ్యతలూ నిర్వర్తించాడు. కానీ ప్రస్తుతం 35 ఏళ్ల ఈ క్రికెటర్ కుటుంబ పరిస్థితి బాగాలేదు. అందుకే నేషనల్ యాంటీ డోపింగ్ ఏజెన్సీలో అటెండర్ ఉద్యోగం కోసం దరఖాస్తు చేసుకున్నాడు.
"నాకు 35 ఏళ్లు. నేను ప్రస్తుతం డిగ్రీ మొదటి సంవత్సరం చదువుతున్నా. నాకు తెలిసింది క్రికెట్ ఒక్కటే. జాతీయ జట్టుకు ప్రాతినిధ్యం వహించా. కానీ నా దగ్గర ప్రస్తుతం డబ్బులు లేవు. నాడాలో అటెండర్ పోస్ట్ ఉందని తెలిసి దరఖాస్తు చేశా. ఈ పోస్టు కోసం అందరికీ 25 ఏళ్ల వయసు నిబంధన విధించారు. దివ్యాంగులకు 35 ఏళ్ల వరకు సడలింపు ఉంది. నేను ఈ పోస్టు పొందాలంటే ఇదే నాకు చివరి అవకాశం."
