China Cyber Attack On America : అగ్రరాజ్యం అమెరికా - చైనాపై తీవ్రమైన ఆరోపణలు చేసింది. తమ ట్రెజరీ డిపార్ట్మెంట్ నెట్వర్క్పై చైనా హ్యాకర్లు సైబర్ దాడులకు పాల్పడినట్లు గుర్తించామని తెల్పింది. వర్క్‌స్టేషన్లను యాక్సెస్ చేసి, కీలకమైన పత్రాలను దొంగిలించేందుకు చైనా హ్యాకర్లు ప్రయత్నించినట్లు పేర్కొంది. అమెరికా ట్రెజరీ డిపార్ట్మెంట్ - కాంగ్రెస్‌కు రాసిన లేఖలో ఈ విషయాలను వెల్లడించినట్లు ఓ మీడియా సంస్థ బయటపెట్టింది.
అప్రమత్తమైన అమెరికా
"వాస్తవానికి ఈ నెల ప్రారంభంలోనే సైబర్ దాడి జరిగింది. థర్డ్‌ పార్టీ సైబర్ సెక్యూరిటీ సర్వీస్‌ ప్రొవైడర్స్ సాయంతో హ్యాకర్లు - అమెరికా ట్రెజరీ వర్క్‌స్టేషన్లతో సహా, కీలకమైన దస్త్రాలను యాక్సెస్ చేయగలిగారు. అయితే డిసెంబర్‌ 8న బియాండ్‌ట్రస్ట్‌ ప్రొవైడర్‌ దీనిని గుర్తించింది. వెంటనే అప్రమత్తమై ఈ విషయాన్ని ట్రెజరీ విభాగానికి తెలిపింది" అని ట్రెజరీ డిపార్ట్మెంట్ అధికార ప్రతినిధి తెలిపారు. అనంతరం చైనా హ్యాకర్లు చేసిన సైబర్ దాడి గురించి, సైబర్ సెక్యూరిటీ అండ్‌ ఇన్‌ఫ్రాస్ట్రక్చర్‌ సెక్యూరిటీ ఏజెన్సీ(CISA), ఎఫ్‌బీఐ దృష్టికి తీసుకెళ్లినట్లు వెల్లడించారు. అయితే దీనిపై ఎఫ్‌బీఐ అధికారులు స్పందించలేదు.
ఆధారం లేకుండా ఆరోపణలు చేయవద్దు!
వాషింగ్టన్‌లోని బీజింగ్‌ రాయబార కార్యాలయం ఈ ఆరోపణలను ఖండించింది. 'ఎటువంటి వాస్తవ ఆధారాలు లేకుండా మాపై అమెరికా చేస్తున్న ఆరోపణలను గట్టిగా వ్యతిరేకిస్తున్నాం' అని పేర్కొంది. మరోవైపు జార్జియాలోని బియాండ్‌ ట్రస్ట్‌ సైతం ఈ సైబర్ దాడి గురించి స్పందించలేదు. అయితే, వారి వెబ్‌సైట్‌లో ఇటీవల తమ కస్టమర్ల భద్రత ముప్పునకు సంబంధించిన ఘటనలు గుర్తించినట్లు తెలిపింది. దీనిపై దర్యాప్తు జరుగుతున్నట్లు వెల్లడించింది. 'బియాండ్‌ ట్రస్ట్‌ వివరించిన సైబర్ ఎటాక్ - ట్రెజరీ నివేదించిన హ్యాకింగ్‌ ఘటనకు దగ్గరగా ఉన్నట్లు గుర్తించాం. అయినప్పటికీ ఈ ఘటనపై విచారణ జరగాల్సి ఉంది' అని ఓ సైబర్ సెక్యూరిటీ కంపెనీ అధికారి పేర్కొన్నారు.
