కొన్నిరోజుల క్రితం కరోనా బారినపడ్డ చెన్నై సూపర్ కింగ్స్ యువ బ్యాట్స్మన్ రుతురాజ్ గైక్వాడ్.. ఇంకా ఐసోలేషన్లోనే ఉన్నాడు. దీంతో సెప్టెంబరు 19న ముంబయి ఇండియన్స్తో జరిగే మ్యాచ్కు అందుబాటులో ఉండడని జట్టు సీఈఓ కాశీ విశ్వనాథన్ చెప్పారు. ప్రస్తుతం అతడి ఆరోగ్యం బాగానే ఉందని, బయో బబుల్లో చేరేందుకు బీసీసీఐ నుంచి ఇంకా అనుమతి రాలేదని పేర్కొన్నారు. మరో రెండురోజుల్లో అతడు బబుల్లోకి అడుగుపెడతాడని ఆశిస్తున్నట్లు వెల్లడించారు.
శిక్షణ శిబిరానికి వెళ్లే ముందు చేసిన కరోనా పరీక్షల్లో.. చెన్నై జట్టులోని ఇద్దరు ఆటగాళ్లతో పాటు 11 మంది సహాయ సిబ్బందికి పాజిటివ్గా తేలింది. వీరిలోనే రుతురాజ్ గైక్వాడ్, దీపక్ చాహర్ ఉన్నారు. ఇటీవలే చాహర్తో పాటు మిగిలిన 11 మంది కొవిడ్ నుంచి కోలుకున్నారు.
గైక్వాడ్ కూడా రెండురోజుల క్రితం పరీక్షలు చేయించుకోగా, ఫలితాలు రావాల్సి ఉంది. ఇందులో నెగిటివ్గా తేలితేనే అతడికి ఇతర వైద్యపరీక్షలు నిర్వహించనున్నారు. మరోవైపు టోర్నీ నుంచి వైదొలిగిన సురేశ్ రైనా స్థానంలో గైక్వాడ్ను తీసుకోవాలని చెన్నై ఫ్రాంచైజీ భావిస్తోంది. ఈ విషయమై ఇప్పటికైతే ఎలాంటి నిర్ణయం తీసుకోలేదని విశ్వనాథన్ స్పష్టం చేశారు.
