వెస్టిండీస్ క్రికెట్ బోర్డు ఆర్థిక నష్టాల నుంచి బయటపడేందుకు కీలక నిర్ణయాలు తీసుకుంటోంది. ఇప్పటికే జులైలో ఇంగ్లాండ్ పర్యటనకు అంగీకరించిన బోర్డు.. తాజాగా ఆటగాళ్లు, సిబ్బంది జీతాల్లో కోత విధించేందుకు సిద్ధమైంది. దీనిపై చర్చలు నిర్వహించిన బోర్డు అధికారులు.. జులై నుంచి ఈ నిర్ణయం అమల్లోకి వస్తుందని తెలిపారు. ఇది మూడు లేదా ఆరు నెలల పాటు కొనసాగిస్తామని.. తర్వాత నుంచి పూర్తి వేతనం ఇస్తామని స్పష్టం చేశారు.
"ప్రసుతం అంతర్జాతీయంగా ఎలాంటి క్రికెట్ మ్యాచ్లు లేకపోవడం వల్ల ఆయా బోర్డులకు ఆర్థిక కష్టాలు ఎదురవుతున్నాయి. విండీస్ క్రికెట్ బోర్డు కూడా అదే పరిస్థితులు ఎదుర్కొంటోంది. ఇది భవిష్యత్తుపైనా ప్రభావం చూపించవచ్చు. అయితే దేశవ్యాప్తంగా క్రికెట్ కమ్యూనిటిలో పనిచేస్తున్న అందిరికీ ఉద్యోగ భద్రత కల్పించాలని నిర్ణయించాం. అందుకే వేతనంలో కోత తప్పట్లేదు. రానున్న ఆరు నెలల్లో సాధారణ పరిస్థితులు వస్తే మళ్లీ జీతంపై నిర్ణయం ప్రకటిస్తాం."
-విండీస్ క్రికెట్ బోర్డు
జులైలో సిరీస్...!
ఇంగ్లాండ్ పర్యటనకు విండీస్ క్రికెట్ బోర్డు శుక్రవారం ఆమోదముద్ర వేసింది. పూర్తిస్థాయిలో సురక్షితమైన వాతావరణంలో తమ బృందం ఆడుతుందని తెలిపింది. జూన్ నెలలో విండీస్-ఇంగ్లాండ్ మధ్య మూడు టెస్ట్‌లు జరగాల్సి ఉంది. కానీ కరోనా కారణంగా ఈ సిరీస్‌ను జులై మొదటి వారానికి వాయిదా వేశారు. జులై 8, 16, 24 తేదీల్లో హ్యాంప్షైర్, ఓల్డ్ ట్రాఫోర్డ్‌ వేదికగా ఈ మ్యాచ్లు జరగనున్నాయి. ప్రేక్షకులు లేకుండానే ఖాళీ స్టేడియాల్లో పోటీలు నిర్వహించనున్నారు. ప్రత్యేక విమానంలో ఆటగాళ్లు ప్రయాణిస్తారని.. ఆటగాళ్లు, సిబ్బందికి కొవిడ్-19 పరీక్షలు నిర్వహిస్తామని విండీస్ బోర్డు తెలిపింది.
