ఇంగ్లాండ్తో జరిగిన తొలి టెస్టులో ఓటమి చెందడంపై విచారం వ్యక్తం చేశాడు టీమ్ఇండియా సారథి కోహ్లీ. తాము అనుకున్నంత ప్రభావవంతంగా ఆడలేకపోయామన్నాడు. ఇంగ్లాండ్ జట్టు ఉత్తమంగా, నిలకడగా ఆడిందని కితాబిచ్చాడు.
"ప్రత్యర్థి జట్టుపై చెప్పుకోదగ్గ స్థాయిలో తీవ్రత చూపించలేకపోయాం. తొలి ఇన్నింగ్స్ రెండో అర్ధభాగంలో బ్యాటింగ్ బాగా చేశాం. రెండో ఇన్నింగ్స్ పర్వాలేదనిపించేలా ఆడాం. అయితే ఇంగ్లాండ్ జట్టు మా కన్నా నిలకడగా, ఉత్తమంగా ఆడింది. మేము వారిపై అధిక ఒత్తిడి తీసుకురాలేకపోయాం. మా బౌలర్లు ఎక్కువ పరుగులు సమర్పించారు. తొలి ఇన్నింగ్స్లో మా బౌలింగ్ విభాగంలోని ఫాస్ట్ బౌలర్లు, అశ్విన్ బాగా ఆడినప్పటికీ ప్రత్యర్థిపై ఇంకాస్త ఒత్తిడి తీసుకొచ్చి కట్టడి చేయాల్సింది. ఏదేమైనప్పటికీ ఈ పిచ్ బౌలర్లకు సహకరించలేదు. అందుకే ప్రత్యర్థి బ్యాట్స్మెన్ బాగా ఆడారు. నదీమ్, సుందర్ చెప్పుకోదగ్గ స్థాయిలో బౌలింగ్ చేయలేదు. మా బౌలింగ్ విభాగం మెరుగుపడాలి.. ఇంగ్లాండ్పై ఆధిపత్యం చలాయించాలి. మొత్తంగా మేము అనుకున్న ప్రణాళికలను సరిగా అమలుచేయడంలో విఫలమయ్యాం. ఏదేమైనప్పటికీ ఈ మ్యాచులో చేసిన తప్పులను సరిచేసుకుని తర్వాతి మ్యాచుల్లో బాగా ఆడతాం."
-కోహ్లీ, టీమ్ఇండియా సారథి.
తమ బౌలర్లు అద్భుతంగా రాణించారని ప్రశంసించాడు ఇంగ్లాండ్ జట్టు సారథి జో రూట్. ప్రతి ఆటగాడు జట్టుకు తమవంతుగా బాగా సహకరించారని కొనియాడాడు. ఈ మ్యాచులో ఓటమి చెందిన భారత్.. తిరిగి పుంజుకుని బలంగా తయారయ్యే అవకాశాలున్నాయని రూట్ అభిప్రాయపడ్డాడు. తర్వాతి మ్యాచ్ కోసం ఎదురుచూస్తున్నట్లు తెలిపాడు. సీనియర్ పేసర్ జేమ్స్ అండర్సన్ బాగా ఆడాడని పొగిడాడు. అతడు జట్టులోని మిగతా ఆటగాళ్లకు రోల్ మోడల్ అని కితాబిచ్చాడు.
ఇదీ చూడండి: టెస్టు ఛాంపియన్షిప్: ఇంగ్లాండ్ టాప్.. భారత్ డౌన్
ఇదీచూడండి: తొలి టెస్ట్: ఇంగ్లాండ్ విజయం- సిరీస్లో 1-0 ఆధిక్యం
