ఆస్ట్రేలియా వేదికగా ఈ ఏడాది జరగాల్సిన టీ20 ప్రపంచకప్ వాయిదా వేయడానికి ఐసీసీ సుముఖత చూపిస్తుందని సమాచారం. త్వరలోనే అధికార ప్రకటన రాబోతుందని ప్రచారం జరుగుతోంది. దీంతో ఇంగ్లాండ్ వేదికగా ద్వైపాక్షిక సిరీస్కు సిద్ధమవ్వాలని ఆసీస్ క్రికెటర్లకు ఆ దేశ క్రికెట్ బోర్డు తెలిపిందని ఓ వార్తాపత్రిక నివేదించింది. ఈ పరిణామాల మధ్య ఐసీసీ టీ20 ప్రపంచకప్ వాయిదా పడనుందని సమాచారం.
"టీ20 ప్రపంచకప్ వాయిదా వేస్తున్నామని మరో వారంలో ఐసీసీ అధికారిక ప్రకటన చేయనుంది. దీంతో ఆటగాళ్లంతా ఇంగ్లాండ్ పర్యటనకు సిద్ధం కావాలని క్రికెట్ ఆస్ట్రేలియా తెలిపింది. బయో సెక్యూర్ వాతావరణంలో ఇంగ్లాండ్, ఆస్ట్రేలియా మధ్య ద్వైపాక్షిక సిరీస్ జరగనుంది. ఇంగ్లీష్ జట్టుతో పరిమిత ఓవర్ల సిరీస్ ముగిసిన తర్వాత ఆసీస్ ఆటగాళ్లు సరాసరి ఐపీఎల్లో పాల్గొంటార"ని ఆస్ట్రేలియన్ వార్తాపత్రిక నివేదించింది.
ప్రస్తుతం సంక్షోభ పరిస్థితుల్లో టీ20 ప్రపంచకప్ నిర్వహణ సాధ్యం కాదని ఆస్ట్రేలియా క్రికెట్ బోర్డు(సీఏ) ఇప్పటికే తెలిపింది. ఈ క్రమంలో అక్టోబరు-నవంబరులో ఐపీఎల్ నిర్వహించడానికి మార్గం సుగమం అయినట్లేనని పలువురు విశ్లేషకులు అభిప్రాయపడుతున్నారు.
