యాషెస్ సిరీస్ తొలి టెస్టులో పట్టు బిగించిందనుకున్నా ఇంగ్లాండ్.. ఓటమికి, డ్రాకు మధ్య వేలాడుతుంది. తొలి మూడు రోజులు ఇంగ్లీష్ జట్టు ఆట చూస్తే విజయం ఖాయమే అనుకున్నారు. కానీ అనూహ్యంగా నాలుగో రోజు ఆస్ట్రేలియా ప్లేయర్లు స్టీవ్ స్మిత్(142), మ్యాథ్యూ వేడ్(110) శతకాలతో విజృంభించి ఇంగ్లాండ్ ముందు 398 పరుగులు లక్ష్యాన్ని ఉంచారు. ఒక్క రోజు మాత్రమే ఆట మిగిలి ఉంది. ఇంగ్లీష్ జట్టు మ్యాచ్ గెలవాలంటే అద్భుతమే జరగాలి. ప్రస్తుతం రెండో ఇన్నింగ్స్లో 13/0 పరుగులతో ఇంగ్లాండ్ బ్యాటింగ్ కొనసాగిస్తోంది.
ఓవర్నైట్ స్కోరు 124/3 పరుగుల వద్ద నాలుగో రోజు ఆట ప్రారంభించిన ఆసీస్ బ్యాట్స్మెన్ ఇంగ్లీష్ బౌలర్లను ఆటాడుకున్నారు. క్రీజులో ఉన్న స్మిత్ - ట్రేవిస్ హెడ్ నిలకడగా ఆడుతూ స్కోరు వేగం పెంచారు. అనంతరం హెడ్(51) ఔటైనా.. వేడ్ సాయంతో ఆసీస్ ఇన్నింగ్స్ను ముందుకు నడిపించాడు స్మిత్. వీరిద్దరూ 126 పరుగుల భాగస్వామ్యాన్ని నెలకొల్పారు.
మరోసారి ఆదుకున్న స్మిత్..
తొలి ఇన్నింగ్స్లో 144 పరుగుల చేసి ఆస్ట్రేలియాను ఆదుకున్న స్మిత్.. రెండో ఇన్నింగ్స్లోనూ సత్తాచాటి కంగారూ జట్టును గెలుపు ముంగిట ఉంచాడు. చూడచక్కని కవర్డ్రైవ్లు, కట్ షాట్లతో ఇంగ్లీష్ బౌలర్లకు చెమటలు పట్టించాడు. 65 బంతుల్లో అర్ధశతకం.. 147 బంతుల్లో వంద పరుగులు పూర్తి చేసి కెరీర్లో 25వ సెంచరీ నమోదు చేశాడు. అనంతరం క్రిస్ వోక్స్ బౌలింగ్లో ఔటయ్యాడు. కానీ అప్పటికే ఆసీస్కు అవసరమైన పరుగులు వచ్చాయి.
శతక్కొట్టిన మ్యాథ్యూ వేడ్ ..
ఆరంభంలో స్టీవ్ స్మిత్కు సహకరిస్తూ ఇన్నింగ్స్ నిర్మాణంలో కీలకపాత్ర పోషించిన వేడ్ అనంతరం దూకుడుగా ఆడాడు. స్మిత్ ఔటైన తర్వాత టిమ్ పైన్తో(34) కలిసి 76 పరుగుల విలువైన భాగస్వామ్యం నెలకొల్పాడు. 131 బంతుల్లో వంద పరుగులు చేసి కెరీర్లో 3వ సెంచరీ నమెదు చేశాడు. ఇందులో 17 ఫోర్లు ఉన్నాయి. చివర్లో ప్యాటిన్సన్(47నాటౌట్), కమిన్స్(26నాటౌట్) ఆడడం వల్ల ఆసీస్ 487 పరుగులు వద్ద డిక్లేర్ ఇచ్చింది.
ఇంగ్లాండ్ బౌలర్లలో స్టోక్స్ 3 వికెట్లు తీయగా.. మొయిన్ అలీ రెండు వికెట్లు తన ఖాతాలో వేసుకున్నాడు. బ్రాడ్, క్రిస్ వోక్స్ తలో వికెట్ తీశారు.
ఆస్ట్రేలియా ఇన్నింగ్స్: 284/10, 487/7
ఇంగ్లాండ్ ఇన్నింగ్స్: 374/10, 13/0
ఈ మ్యాచ్లో రికార్డులు...
- యాషెస్ సిరీస్లో స్మిత్కు ఇది పదొ శతకం.
- 2003లో మ్యాథ్యూ హెడెన్ తర్వాత యాషెస్ సిరీస్లో రెండు ఇన్నింగ్స్ల్లో శతకాలు చేసిన బ్యాట్స్మెన్గా స్మిత్ ఘనత సాధించాడు.
- డాన్ బ్రాడ్మాన్ తర్వాత వేగంగా 25 సెంచరీలు(32 ఇన్నింగ్స్ల్లో) చేసిన ఆటగాడిగా స్టీవ్ స్మిత్ రికార్డు సృష్టించాడు. 119 ఇన్నింగ్స్ల్లో ఈ ఘనత అందుకున్నాడు.
- ఈ మ్యాచ్లో మ్యాథ్యూ వేడ్ కెరీర్లో 3వ సెంచరీతో పాటు వెయ్యి పరుగులు పూర్తి చేశాడు.
ఇది చదవండి: కశ్మీర్లో జవాన్లతో ధోనీ వాలీబాల్
