యాషెస్ నాలుగో టెస్టు ఆస్ట్రేలియా వైపు మొగ్గుతోంది. మాంచెస్టర్ వేదికగా జరుగుతున్న ఈ మ్యాచ్లో ఇంగ్లాండ్ 200 పరుగులకే ఐదు వికెట్లు కోల్పోయి పీకల్లోతు కష్టాల్లో పడింది. ఆసీస్ బౌలర్ జాష్ హెజిల్వుడ్ 4 వికెట్లతో విజృంభించాడు. ఇంగ్లీష్ బ్యాట్స్మెన్ రోరీ బర్న్స్(81), జోయ్ రూట్(71) అర్ధశతకాలతో ఆకట్టుకున్నప్పటికీ మిగతా ఆటగాళ్లు పెద్దగా రాణించలేదు.
వర్షం వల్ల మూడోరోజు ఉదయం సెషన్ అంతా తుడిచిపెట్టుకుపోయింది. ఓవర్నైట్ స్కోరు 23/1 వద్ద బ్యాటింగ్ ప్రారంభించిన ఇంగ్లీష్ జట్టు ఆరంభంలోనే క్రేగ్ ఓవర్టన్(5) వికెట్ కోల్పోయింది. ఇలాంటి తరుణంలో బర్న్స్ - రూట్ జోడి ఇంగ్లాండ్ ఇన్నింగ్స్ ముందుకు నడిపించింది. వీరిద్దరూ 141 పరుగుల విలువైన భాగస్వామ్యం నెలకొల్పారు.
నిలకడగా ఆడుతున్న బర్న్స్ను ఔట్ చేసి ఈ జోడీని విడదీశాడు హెజిల్వుడ్. అదే ఊపులో రూట్ను కూడా ఔట్ చేసి ఇంగ్లాండ్ను దెబ్బతీశాడు. అనంతరం జేసన్ రాయ్నూ పెవిలియన్కు పంపాడు. మూడోరోజు ఓవర్టన్తో మొదలైన వికెట్ల పతనాన్ని జేసన్రాయ్తో ముగించాడు హెజిల్వుడ్. 166/2 పరుగులతో పటిష్ఠ స్థితిలో ఉన్న ఇంగ్లాండ్ హెజిల్వుడ్ దెబ్బకు కుదేలైంది.
వర్షం కారణంగా మూడో రోజు ఆట 64 ఓవర్లే సాధ్యమైంది. ప్రస్తుతం బెన్ స్టోక్స్(7), బెయిర్స్టో(2) క్రీజులో ఉన్నారు. వీరిద్దరిపైనే ఇంగ్లీష్ జట్టు ఆశలు పెట్టుకుంది.
నాలుగో టెస్టులో క్రమంగా పట్టుబిగిస్తోంది ఆసీస్. తొలి ఇన్నింగ్స్లో 497/8 స్కోరు వద్ద డిక్లేర్ చేసింది కంగారూ జట్టు. స్టీవ్ స్మిత్(211) డబుల్ సెంచరీతో మరోసారి ఆదుకున్నాడు.
ఇదీ చదవండి: మలింగనా మజాకా.. 4 బంతుల్లో 4 వికెట్లు..!
