సచిన్ తెందూల్కర్, విరాట్ కోహ్లీ వంటి స్టార్ క్రికెటర్ల బ్యాట్లను రిపేర్ చేసిన.. బ్యాట్ మేకర్ అష్రఫ్ చౌదరికి కరోనా సోకింది. ప్రస్తుతం ఆయన సబర్బన్ అంధేరిలోని సెవెన్ హిల్స్ ఆస్పత్రిలో చికిత్స పొందుతున్నారు. అష్రఫ్ పలు అనారోగ్య సమస్యలతో బాధపడుతున్నట్లు వైద్యులు తెలిపారు. ఈ విషయం తెలిసిన వెంటనే తెందూల్కర్ ఆస్పత్రి యాజమాన్యాన్ని సంప్రదించి.. అష్రఫ్ను ప్రత్యేకంగా ఏర్పాటు చేసిన గదికి మార్పించి చికిత్స అందించాలని కోరారు.
"అష్రఫ్కు చెంబూర్లోని ఆస్పత్రిలో చేసిన పరీక్షల్లో కరోనా పాజిటివ్ తేలింది. దీనిపై తెందూల్కర్ నాతో మాట్లాడారు. అతన్ని సెవెన్ హిల్స్ ఆస్పత్రికి మార్చి.. ప్రత్యేక సౌకర్యాన్ని కల్పించమని కోరారు. సచిన్ చెప్పినట్లుగానే చేసి.. అష్రఫ్ ఆరోగ్య పరిస్థితిని పర్యవేక్షిస్తున్నాం."
-డాక్టర్. భుజంగ్ పాయ్, వైద్యుడు
గతంలోనూ అష్రఫ్ అనారోగ్యం బారిన పడి ఆస్పత్రిలో చేరినప్పుడు.. సచిన్ ఆయనకు అండగా నిలిచారు. ఆర్థికంగానూ సాయపడ్డారు.
అనేక మంది స్టార్ ఆటగాళ్ల బ్యాట్స్ను రిపేర్ చేసిన వ్యక్తి అష్రఫ్. అంతర్జాతీయ, ఐపీఎల్ మ్యాచ్ల్లో వాంఖడే స్టేడియంలో ఎప్పుడూ కనిపిస్తుంటారు. అయితే, కరోనా కారణంగా ఆయన వ్యాపారం, ఆరోగ్యం రెండూ దెబ్బతిన్నాయి. ఆస్ట్రేలియా క్రికెటర్ స్టీవ్ స్మిత్, వెస్టిండీస్ ఆటగాడు క్రిస్ గేల్, పొలార్డ్ వంటి విదేశీ ఆటగాళ్లకూ బ్యాట్ చేశాడు అష్రఫ్.
