బయో సెక్యూర్ నిబంధనలు ఉల్లంఘించిన కారణంగా ఇంగ్లాండ్ స్టార్ ఆల్రౌండర్ జోఫ్రా ఆర్చర్.. క్రమశిక్షణ చర్యలు ఎదుర్కొవాల్సి ఉంటుందని ఆ దేశ క్రికెట్ బోర్డు (ఈసీబీ) డైరెక్టర్ ఆష్లే గైల్స్ వెల్లడించారు. అతడి చర్య వల్ల బోర్డుకు పదిలక్షల పౌండ్లు నష్టం వాటిల్లిందని పేర్కొన్నారు.
నిబంధనలు అతిక్రమించిన కారణంగానే వెస్టిండీస్తో గురువారం ప్రారంభమైన రెండో టెస్టు నుంచి ఆర్చర్ను తప్పించారు. ఫలితంగా రెండుసార్లు కొవిడ్ పరీక్షలు జరపడం సహా ఐదు రోజుల పాటు ఐసోలేషన్లో ఉండనున్నాడీ క్రికెటర్.
అయితే ఈ విషయమై ఆర్చర్, బోర్డుకు ఎటువంటి సమాచారం ఇవ్వలేదు. తొలి టెస్టు ముగిసిన తర్వాత బర్మింగ్హమ్లోని ఇతడు తన ఇంటికి వెళ్లినట్లు సమాచారం. ఈ నేపథ్యంలోనే తప్పును అంగీకరిస్తూ క్షమాపణలు కోరాడు. దీనిపై స్పందించిన ఇంగ్లాండ్ బోర్డు.. "సాధారణ పరిస్థితుల్లో మ్యాచ్ల మధ్య ఇంటికి వెళ్లడం సాధారణమే. కానీ బయో సెక్యూర్ వాతారణాన్ని నెలకొల్పేందుకు ఎంతో పని, డబ్బు ఖర్చు చేయాల్సి వచ్చింది. ఈ చర్యతో ఆర్చర్ జట్టు మొత్తాన్ని నిరాశపరిచాడు" అంటూ పేర్కొంది.
కరోనా వ్యాప్తి ఉన్నాసరే వెస్టిండీస్, పాకిస్థాన్ జట్లను తమ దేశంలో పర్యటించేందుకు ఈసీబీ విశ్వ ప్రయత్నాలు చేసి సఫలమైంది. విండీస్తో టెస్టు సిరీస్ అనంతరం పాకిస్థాన్తో టెస్టు, టీ20 సిరీస్ను ఆడనుంది ఇంగ్లాండ్. ఐర్లాండ్, ఆస్ట్రేలియాలూ ఈ సీజన్లో ఇంగ్లీష్ గడ్డపై మ్యాచ్లు ఆడనున్నాయి.
ఇదీ చూడండి: 'ఆ విషయాల్లో ధోనీ అడుగుజాడల్లోనే నడుస్తా'
