క్రికెట్లో 100 అంతర్జాతీయ సెంచరీలు నమోదు చేసి.. 34 వేలకు పైగా పరుగులు చేసిన సుదీర్ఘ ప్రయాణంలో ఉత్తమ ఇన్నింగ్స్ ఎంపికచేయడమంటే కష్టమైన పనే. కానీ, తన కెరీర్లో ఉత్తమమైన ఇన్నింగ్స్ను ఎంచుకోవడం సులభమని అంటున్నాడు మాస్టర్ బ్లాస్టర్ సచిన్ తెందుల్కర్. తన క్రికెట్ కెరీర్లోని మూడు ఇన్నింగ్స్ను మళ్లీ మళ్లీ చూడటానికి వెనుకాడనని ఇటీవలే ఓ ఇంటర్వ్యూలో చెప్పాడు.
"1998లో షార్జా వేదికగా ఆస్ట్రేలియాతో వరుసగా సెమీఫైనల్, ఫైనల్ రెండు మ్యాచ్లు ఆడాల్సివచ్చింది. ఫైనల్కు చేరుకోవడానికి సెమీస్లో తప్పనిసరిగా గెలవాలి. కానీ, అందులో ఓడినా చివరికి ఫైనల్ చేరాం. ఆ తర్వాత ప్రపంచకప్-2003లో పాకిస్థాన్తో ఆడిన మ్యాచ్ను చూడటం ఎప్పటికీ ఇష్టమే. అంతకుముందే 1989లో పాకిస్థాన్ పర్యటనకు నవంబరు-డిసెంబరులో వెళ్లాం. అప్పటికి నా వయసు 16 ఏళ్లు. అంతర్జాతీయ కెరీర్లో అది నా మొదటి పర్యటన. అక్కడ కొన్ని ప్రాంతాలు శీతలంగా ఉన్నాయి. ఉష్ణోగ్రత పడిపోయినా.. మా ఆటతీరుతో వెచ్చని విజయం పొందాం. నేను ఇంటికి తిరిగి వచ్చినప్పుడు.. నా ఆటతీరుపై కుటుంబసభ్యులు ఆనందాన్ని వ్యక్తం చేశారు".
- సచిన్ తెందుల్కర్, దిగ్గజ క్రికెటర్
షార్జా వేదికగా 1998లో జరిగిన కోకా కోలా కప్లో టీమ్ఇండియా విజయం సాధించింది. ఆస్ట్రేలియా, న్యూజిలాండ్, భారత్ మధ్య జరిగిన సిరీస్లో ఒక్క మ్యాచే గెలిచినా ఎక్కువ రన్రేట్ కారణంగా ఫైనల్కు చేరి ఆస్ట్రేలియాను చిత్తు చేసింది. ఆస్ట్రేలియా లీగ్ దశలో 4 మ్యాచ్లు గెలవడం గమనార్హం.
ఇందులో సచిన్ తెందుల్కర్ ఇన్నింగ్స్ కీలకం. ఫైనల్కు ముందు కీలక మ్యాచ్లో 143 పరుగులు చేసిన మాస్టర్.. అదే జట్టుపై ఫైనల్లో 134 రన్స్ చేసి టీమ్ఇండియా విజయంలో కీలక పాత్ర పోషించాడు. సచిన్ ఇన్నింగ్స్ను 'ఎడారిలో పరుగుల తుపాను'గా అభిమానులు వర్ణిస్తారు.
ప్రపంచకప్-2003లో పాకిస్థాన్తో జరిగిన మ్యాచ్లో సచిన్ 98 పరుగులు చేసి జట్టు విజయానికి సహకరించాడు. అలాగే 1989లో అదే జట్టుపై జరిగిన టెస్టు సిరీస్లోనూ మాస్టర్ పరుగుల వరద పారించాడు. ఆ విధంగా కెరీర్లో తనకు ఇష్టమైన మూడు ఇన్నింగ్స్ సందర్భాలను సచిన్ గుర్తు చేసుకున్నాడు.
