క్రికెట్ ప్రియులను అలరించడానికి మరికొన్ని రోజుల్లో ప్రపంచకప్ మొదలవబోతోంది. మొత్తం 10 దేశాలు పాల్గొంటున్న ఈ టోర్నీ మే 30న ప్రారంభంకానుంది. ఇప్పటివరకు ఈ ప్రతిష్టాత్మక టైటిల్ పోరులో ఎక్కువ పరుగులు సాధించిన మొదటి ఐదురుగు ఆటగాళ్లను ఓసారి చూద్దాం.
5. డివిలియర్స్ (దక్షిణాఫ్రికా)
- మూడు ప్రపంచకప్లలో పాల్గొన్న ఈ సఫారీ ఆటగాడు మంచి ప్రదర్శన కనబర్చాడు. మొత్తం 22 ఇన్నింగ్స్లలో 63.53 సగటుతో 1,207 పరుగులు సాధించాడు. స్ట్రైయిక్ రేట్ 117.30 గా ఉంది. రెండుసార్లు జట్టును సెమీస్ (2007, 2015) చేర్చడంలో కీలకపాత్ర వహించాడు. అభిమానులు మిస్టర్ 360గా పిలుచుకునే డివిలియర్స్ మూడు ప్రపంచకప్ల్లో నాలుగు శతకాలు బాదాడు. అభిమానులకు చేదువార్త ఏంటంటే ఏబీడీ అంతర్జాతీయ క్రికెట్ నుంచి రిటైర్మెంట్ తీసుకోవడం. అన్ని ఫార్మాట్లకు దూరమైన డివిలియర్స్ ఈ ప్రపంచకప్లో ఆడడం లేదు.డివిలియర్స్
4. బ్రియన్ లారా ( వెస్టిండీస్)
- వెస్టిండీస్ క్రికెట్ సంచలనం లారా 2003, 2007 ప్రపంచకప్ల్లో విండీస్ జట్టుకు కెప్టెన్గా వ్యవహరించాడు. మొత్తం 33 ఇన్నింగ్స్ల్లో 1,225 పరుగులు సాధించాడు. ఓ దశలో కరీబియన్ జట్టుకు వెన్నెముకగా నిలిచాడీ ఆటగాడు. మెగాటోర్నీలో రెండు శతకాలతో పాటు ఏడు అర్ధశతకాలు సాధించాడు. అత్యధిక స్కోర్ 116 పరుగులు. లారా
3. కుమార సంగక్కర (శ్రీలంక)
- ప్రపంచ అత్యుత్తమ వికెట్ కీపర్, బ్యాట్స్మన్ అయిన సంగక్కర జెంటిల్మన్ క్రికెటర్గా పేరు సంపాదించాడు. 2015 ప్రపంచకప్ తర్వాత రిటైర్మెంట్ తీసుకుని అభిమానులకు షాక్ ఇచ్చాడు. ఆ వరల్డ్కప్లో వరుసగా నాలుగు శతకాలు సాధించి ఔరా అనిపించాడు. మొత్తం 35 ప్రపంచకప్ ఇన్నింగ్స్ల్లో 56.74 సగటుతో 1,535 పరుగులు సాధించాడు. స్ట్రైయిక్ రేట్ 86.55గా ఉంది. 2015 మెగాటోర్నీకి ముందు ప్రపంచకప్లో కేవలం ఒకే శతకం చేసిన సంగక్కర.. 2015 వరల్డ్కప్లో ఏకంగా నాలుగు శతకాలు బాది ప్రతిష్టాత్మక టోర్నీలో అత్యధిక శతకాలు చేసిన రెండో ఆటగాడిగా పాంటింగ్ సరసన నిలిచాడు.సంగక్కర
2. రికీ పాంటింగ్ (ఆస్ట్రేలియా)
- ఆసీస్ జట్టుకు రెండు సార్లు ప్రపంచకప్ అందించిన సారథి పాంటింగ్. మొత్తం 42 ఇన్నింగ్స్ల్లో 45.97 సగటుతో 1,743 పరుగులు సాధించి వరల్డ్కప్లో అత్యధిక పరుగులు సాధించిన రెండో ఆటగాడిగా ఉన్నాడు. స్ట్రైయిర్ రేట్ 79.95గా ఉంది. అత్యధిక పరుగులు చేసిన మొదటి ఐదుగురు బ్యాట్స్మెన్ స్ట్రైయిక్ రేట్లలో ఇదే అత్యల్పం కావడం విశేషం. ఈ మెగాటోర్నీలో మొత్తం 5 శతకాలు సాధించి అత్యధిక సెంచరీలు సాధించిన ఆటగాళ్లలో సంగక్కరతో పాటు రెండో స్థానంలో ఉన్నాడు.రికీ పాంటింగ్
1. సచిన్ తెందుల్కర్ (భారత్)
- ప్రపంచ క్రికెట్లోనే కాదు ప్రపంచకప్లోనూ రికార్డుల్లో సచిన్ ముందుంటాడు. ఈ మెగాటోర్నీలో అత్యధిక పరుగులు చేసిన ఆటగాడిగా అగ్రస్థానంలో ఉన్నాడు మాస్టర్ బ్లాస్టర్. మొత్తం 45 మ్యాచ్ల్లో 2,278 పరుగులు చేశాడు. వరల్డ్కప్లో రెండు వేల పరుగులు దాటిన మొదటి క్రికెటర్గా ఘనత సాధించాడు. ఈ ప్రతిష్టాత్మక టోర్నీలో అత్యధిక శతకాలతో పాటు అత్యధిక అర్ధశతకాల రికార్డు సచిన్ పేరిటే ఉంది. మొత్తం 6 సెంచరీలు, 15 అర్ధసెంచరీలతో ముందున్నాడు. సచిన్ కెరియర్లో 2003 ప్రపంచకప్ గుర్తుండిపోతుంది. ఆ టోర్నీలో నమీబియాపై సాధించిన 152 పరుగులు ప్రపంచకప్ సెంచరీల్లో అత్యుత్తమమైంది.సచిన్
ఇవీ చూడండి.. WC19 : గెలుపు ముంగిట "మలుపు" కథలు
