మహిళా క్రికెటర్లకు బీసీసీఐ వార్షిక కాంట్రాక్టులను ఇటీవల ప్రకటించింది. అయితే కాంట్రాక్ట్ లిస్ట్లో పేరు దక్కించుకోలేకపోయిన వేదా కృష్ణమూర్తి, ఏక్తా బిస్త్, అనుజా పాటిల్, డి.హేమలతకు ఎనిమిది నెలలుగా జీతాలు చెల్లించట్లేదని బోర్డుపై ఆరోపణలు వచ్చాయి.
తాజాగా దీనిపై స్పందించిన ఓ బీసీసీఐ అధికారి అవన్నీ అవాస్తమని కొట్టిపారేశారు. "అవన్నీ పుకార్లు. అవాస్తవాలు. ప్రతి క్రీడాకారుడితో ఉన్న ఒప్పందం, నిబంధనల ప్రకారం బీసీసీఐ వారికి ఇవ్వాల్సిన మొత్తాన్ని చెల్లిస్తుంది. ఒప్పంద కాలానికి చెల్లింపులు జరిగిపోయాయి" అని స్పష్టం చేశారు.
గతేడాది జరిగిన మహిళల టీ20 ప్రపంచకప్నకు సంబంధించి రావాల్సిన ప్రైజ్మనీ.. త్వరలోనే భారత క్రికెటర్లకు అందుతుందని ఇటీవల ఓ బీసీసీఐ అధికారి తెలిపారు. రన్నరప్గా నిలిచిన హర్మన్ప్రీత్ కౌర్ సేనకు రావాల్సిన రూ.3.64 కోట్లు త్వరలోనే అందుతాయని పేర్కొన్నారు. అయితే కొన్ని సందర్భాల్లో ఇలాంటి క్లిష్ట పరిస్థితులను ఎదుర్కోవాల్సిన పరిస్థితి వస్తుందని సదరు అధికారి అన్నారు. భవిష్యత్తులో ఇలాంటి సమస్యలు తలెత్తకుండా బోర్డు ఫైనాన్స్ డిపార్ట్మెంట్ను మరింత పటిష్ఠంగా పునరుద్ధరించనున్నట్లు వెల్లడించారు.
ఇదీ చూడండి మహిళా క్రికెటర్ల కాంట్రాక్టులు ప్రకటించిన బీసీసీఐ
