భారత నియంత్రణ క్రికెట్ సంస్థ (బీసీసీఐ) వార్షిక సర్వసభ్య సమావేశంపై (BCCI AGM 2021) కార్యదర్శి జై షా (BCCI Secretary Jay Shah) స్పందించారు. కరోనా కారణంగా ఈ ఏడాది జరగాల్సిన మీటింగ్ను సెప్టెంబర్ 30కి ముందు నిర్వహించట్లేదని స్పష్టం చేశారు. తదుపరి తేదీని నిర్ణయించాక బీసీసీఐ అనుబంధ సంస్థలకు వెల్లడిస్తామని పేర్కొన్నారు.
తమిళనాడు ప్రభుత్వానికి సంబంధించిన ఓ ఉత్తర్వును కూడా జై షా లేఖలో పేర్కొన్నారు. కొవిడ్ మహమ్మారి ప్రబలంగా ఉన్న కారణంగా 2020-21కి సంబంధించి వార్షిక సర్వసభ్య సమావేశాలు సెప్టెంబర్ నుంచి డిసెంబర్కు మూడు నెలలు వాయిదా వేయాలని జారీ చేసిన జీవోను ఆయన ఉదహరించారు. జూన్ 30, 2021న జీవో నంబర్ 96 పేరుతో ఈ జీవోను తమిళనాడు ప్రభుత్వం జారీ చేసింది. ఈ ఉత్తర్వును దృష్టిలో ఉంచుకుని తాజా నిర్ణయం తీసుకున్నట్లు షా స్పష్టం చేశారు.
బీసీసీఐ 89వ వార్షిక సర్వసభ్య సమావేశాన్ని గతేడాది డిసెంబర్ 24న నిర్వహించింది. తాజా కొవిడ్ నేపథ్యంలో ఏజీఎం మీటింగ్ జరగదని తెలిసే.. లార్డ్స్ వేదికగా జరిగిన టెస్టు మ్యాచ్ సందర్భంగా బీసీసీఐ అధికారులు, సిబ్బంది, కోచింగ్ సిబ్బంది కలుసుకున్నట్లు తెలుస్తోంది. టీ20 ప్రపంచకప్, ఐపీఎల్ గురించి చర్చలు అక్కడే జరిగినట్లు సమాచారం.
ఇదీ చదవండి: 'గతంలో ఇలా ఆడలేదు.. కొత్త పుజారాను చూస్తున్నాం'
