ఆస్ట్రేలియాతో జరుగుతున్న బోర్డర్-గావస్కర్ ట్రోఫీ సిరీస్లో భాగంగా జరిగే చివరిదైన నాలుగో టెస్టు మ్యాచ్కి కూడా కెప్టెన్ స్టీవ్ స్మితే సారథిగా వ్యవహరించనున్నాడని ఆస్ట్రేలియా క్రికెట్ బోర్డు ప్రకటించింది. కాగా, ఈ మ్యాచ్ మార్చి 9 నుంచి 13 వరకు అహ్మదాబాద్ వేదికగా జరగనుంది. అంతకుముందు తొలి రెండు టెస్టులకు పాట్ కమిన్స్ సారథిగా ఉన్నాడు. అయితే తన తల్లి మారియా రోమ్ము క్యాన్సర్తో బాధపడుతుండటం వల్ల దిల్లీలో జరిగిన రెండో టెస్టు మ్యాచ్ తర్వాత స్వదేశానికి తిరిగి వెళ్లిపోయాడు కమిన్స్. దీంతో తాత్కాలికంగా మూడో టెస్టుకు స్టీవ్ స్మిత్ను కెప్టెన్గా ఎంపిక చేసింది ఆసీస్ క్రికెట్ బోర్డు. అయితే, కమిన్స్ అందుబాటులో లేకపోవడం వల్ల చివరి మ్యాచ్కి కూడా అతడే కెప్టెన్గా కొనసాగుతాడని స్పష్టం చేశారు సెలెక్టర్లు.
తాజాగా ఇందౌర్లో జరిగిన మూడో టెస్టుకు స్మిత్ కెప్టెన్గా వ్యవహరించాడు. భారత్ పర్యటనలో ఉన్న ఆసీస్.. మొదటి విజయాన్ని ఇతడి సారథ్యంలోనే మూడో టెస్టులో నమోదు చేసింది. ఈ మ్యాచ్లో తొమ్మిది వికెట్ల తేడాతో విజయం సాధించారు కంగారులు. ఈ విజయంతో జూన్ 7న లండన్లోని ఓవల్‌ స్టేడియంలో జరగబోయే ఐసీసీ వరల్డ్ టెస్ట్ ఛాంపియన్‌షిప్ 2021-23కు ఫైనల్ బెర్తును ఖరారు చేసుకుంది ఆసీస్. అయితే ఫైనల్లో తమతో పోటీ పడేందుకు భారత్ లేదా శ్రీలంక జట్లలో ఏది వస్తుందో అని ఎదురు చూస్తోంది ఆస్ట్రేలియా.
గతేడాది వన్డే సిరీస్కు వీడ్కోలు పలిగిన ఆరోన్ ఫించ్ స్థానంలో వన్డేకు సారథిగా నియమితుడయ్యాడు కమిన్స్. అయితే ఈ నెల 17న ముంబయి వేదికగా భారత్తో జరగబోయే వన్డే సిరీస్కు పాట్ కమిన్స్ అందుబాటులో ఉంటాడా.. లేదా అన్న దానిపై ఇంకా స్పష్టత లేదు.
చీఫ్ గెస్ట్లుగా ఇద్దరు ప్రధానులు..
అయితే మార్చి 9న అహ్మదాబాద్‌లో జరిగే బోర్డర్-గావస్కర్ ట్రోఫీలో చివరిదైన నాల్గో టెస్టు మ్యాచ్ మొదటి రోజు ఆటను వీక్షించేందుకు భారత ప్రధాని నరేంద్ర మోదీతో పాటు ఆస్ట్రేలియా ప్రధాని ఆంథోనీ అల్బనీస్ రానున్నారు. ఈ ట్రోఫీలో తొలి రెండు మ్యాచ్‌ల్లో భారత్ విజయం సాధించగా.. మూడో టెస్టులో ఆసీస్ గెలిచి టీమ్‌ఇండియా ఆధిక్యాన్ని 2-1కి తగ్గించింది.
