Eng vs Nz first test: న్యూజిలాండ్, ఇంగ్లాండ్ మధ్య తొలి టెస్టు రసవత్తరంగా మొదలైంది. మంచి ఆరంభాన్ని ఇంగ్లిష్ జట్టు వృథా చేసుకుంది. గురువారం లార్డ్స్‌లో ప్రారంభమైన మ్యాచ్లో అరంగేట్ర పేసర్ మాథ్యూ పాట్స్తో (4/13) పాటు అండర్సన్‌ (4/66) చెలరేగడంతో తొలి ఇన్నింగ్స్‌లో కివీస్ 132 పరుగులకే కుప్పకూలింది. గ్రాండ్‌హోమ్‌ (42 నాటౌట్‌) నిలబడకపోయింటే ఆ జట్టు పరిస్థితి మరింత దారుణంగా ఉండేది.
అనంతరం తొలి ఇన్నింగ్స్‌ ఆరంభించిన ఇంగ్లాండ్‌కు ఓపెనర్లు లీస్‌ (25), క్రాలీ (43) అదిరే ఆరంభం ఇచ్చారు. 59 పరుగుల వద్ద తొలి వికెట్ కోల్పోయిన అనంతరం మిగతా బ్యాటర్లంతా పెవిలియన్కు క్యూ కట్టారు. తొలి రోజు ఆట ముగిసే సమయానికి ఆ జట్టు 116 పరుగులకే 7 వికెట్లు కోల్పోయింది. కివీస్ బౌలర్లలో జేమీసన్‌ (2/20), బౌల్ట్‌ (2/15), సౌథీ (2/40) ఇంగ్లాండ్‌ను దెబ్బతీశారు. ఆట ముగిసే సమయానికి బెన్ ఫోక్స్‌ (6), బ్రాడ్‌ (4) క్రీజులో ఉన్నారు.
లార్డ్స్ వేదికగా జరుగుతున్న ఈ మ్యాచ్లో కివీస్ జట్టు టాస్ గెలిచి బ్యాటింగ్ ఎంచుకుంది. ఇంగ్లాండ్ బౌలర్ల ధాటికి తక్కువ స్కోరుకే ఆలౌట్ అయింది. మరోవైపు ఇంగ్లిష్ జట్టు కెప్టెన్ బెన్ స్టోక్స్ పూర్తి స్థాయి సారథ్య బాధ్యతలు చేపట్టిన తర్వాత ఇదే తొలి మ్యాచ్ కావడం గమనార్హం. తొలి రోజు ఆతిథ్య జట్టే పైచేయి సాధించినప్పటికీ రెండో రోజు మ్యాచ్ ఎలా మలుపుతిరుగుతుందో చూడాలి.
ఇదీ చదవండి: IPL 2022: చర్చంతా కోహ్లీ, ఆర్సీబీ గురించే.. నెటిజన్ల రచ్చ రచ్చ!
