అఫ్గానిస్థాన్లో ప్రస్తుతం అసాధారణ పరిస్థితులు నెలకొన్నాయి. తాలిబన్లు ఆ దేశాన్ని ఆక్రమించుకున్నారు. దీంతో అఫ్గాన్ క్రికెట్ జట్టు పొట్టి ప్రపంచకప్లో ఆడుతుందా? లేదా? అనేది అనుమానంగా మారింది. దీనిపై స్పష్టత ఇచ్చింది అఫ్గానిస్థాన్ క్రికెట్ బోర్డు.
"అవును, వచ్చే ప్రపంచకప్లో మేము పాల్గొంటాం. అందుకు సంబంధించి సన్నాహాలు జరుగుతున్నాయి. అందులో భాగంగా కాబుల్లో జరిగే శిక్షణా కార్యక్రమాల్లో ఆటగాళ్లు పాల్గొననున్నారు. వరల్డ్కప్కు ముందు ప్రాక్టీస్ మ్యాచ్ల్లో భాగంగా ఆసీస్, విండీస్తో ట్రై సిరీస్ కోసం ఎదురుచూస్తున్నాం. శ్రీలంక లేదా మలేసియాను వేదికగా నిర్ణయించాలనుకుంటున్నాం."
-హిక్మత్ హస్సన్, అఫ్గానిస్థాన్ క్రికెట్ జట్టు మీడియా మేనేజర్.
"పాకిస్థాన్తో నిర్ణయించిన సిరీస్తో పాటు దేశవాళీ టీ20 టోర్నీలు కూడా జరుగుతాయి. పొట్టి ప్రపంచకప్కు ముందు మా ఆటగాళ్లకు ఈ సన్నద్ధత చాలా ఉపయోగపడనుంది" అని హస్సన్ అభిప్రాయపడ్డారు.
'ప్రస్తుతం రషీద్ ఖాన్, మహ్మద్ నబీ దేశంలో లేరు కదా వారికి ఒక మాట చెప్పారా?' అన్న ప్రశ్నకు హస్సన్ బదులిచ్చారు. "మా ఆటగాళ్లు, వారి కుటుంబసభ్యుల సంక్షేమానికి కట్టుబడి ఉన్నాం. వారి కోసం మాకు చేతనైన సాయం చేస్తాం. కాబుల్లో పరిస్థితులు మరీ దారుణంగా ఏమీ లేవు. అంతగా ఆందోళన చెందాల్సిన పని లేదు" అని హస్సన్ పేర్కొన్నారు.
ఇక టీ20 ప్రపంచకప్ విషయానికొస్తే మొత్తం 12 జట్లు ఈ మెగా ఈవెంట్లో పాల్గొననున్నాయి. మార్చి 20, 2021 నాటికి ర్యాంకింగ్స్లో తొలి ఎనిమిది స్థానాల్లో ఉన్న జట్లతో పాటు క్వాలిఫయర్స్ మ్యాచ్లు ఆడటం ద్వారా మరో నాలుగు జట్లు ఈ పొట్టి కప్కు అర్హత సాధిస్తాయి.
గ్రూప్-1లో వెస్టిండీస్, ఇంగ్లాండ్, ఆస్ట్రేలియా, దక్షిణాఫ్రికా ఉండగా.. గ్రూప్-2లో ఇండియా, పాకిస్థాన్, న్యూజిలాండ్, అఫ్గానిస్థాన్ జట్లున్నాయి. శ్రీలంక, బంగ్లాదేశ్, ఐర్లాండ్, నెదర్లాండ్స్, నమీబియా, ఒమన్, పీఎన్జీ, స్కాట్లాండ్ నుంచి మిగిలిన నాలుగు జట్లు అర్హత సాధించనున్నాయి.
ఇదీ చదవండి: Rashid khan: 'అఫ్గాన్ క్రికెటర్లు ఇద్దరూ ఐపీఎల్లో ఆడతారు'
