వరుసగా రెండో ఏడాది తనను అర్జున అవార్డుకు నామినేట్ చేయకపోవడంపై భారత షట్లర్ హెచ్.ఎస్.ప్రణయ్ అసహనం వ్యక్తం చేశాడు. ఆటలో తన కంటే తక్కువ పరిణతి గల వ్యక్తులను బ్యాడ్మింటన్ అసోసియేషన్ ఆఫ్ ఇండియా (బాయ్) ఎంపిక చేసిందని అభిప్రాయం వ్యక్తం చేశాడు. ఈ నేపథ్యంలో తన నిస్సహాయతను వ్యక్తం చేస్తూ ట్వీట్ చేశాడీ ఆటగాడు.
"అర్జున అవార్డ్స్లో గతేడాది జరిగిందే ఇప్పుడు జరిగింది. కామన్వెల్త్, ఆసియన్ ఛాంపియన్షిప్లలో పతకాలు సాధించిన వారిని కాకుండా ఏ విధమైన పతాలను సాధించని ప్లేయర్లను నామినేట్ చేశారు"
- హెచ్.ఎస్ ప్రణయ్, భారత షట్లర్
ఈ పురస్కారానికి డబుల్స్ జోడీ సాత్విక్ సాయిరాజ్, చిరాగ్ శెట్టితో పాటు సింగిల్స్ ప్లేయర్ సమీర్ వర్మను నామినేట్ చేసింది బాయ్. వీరిలో సాత్విక్-చిరాగ్.. 2018లో జరిగిన కామన్వెల్త్ గేమ్స్లో రజతాన్ని దక్కించుకున్నారు.
దరఖాస్తులు చేసేందుకు గడువు పెంపు
జాతీయ క్రీడా పురస్కారాల దరఖాస్తుల గడువును కేంద్ర క్రీడా మంత్రిత్వ శాఖ జూన్ 22 వరకు పెంచింది. లాక్డౌన్తో అథ్లెట్లు ఎదుర్కొంటున్న సమస్యల కారణంగా ప్రక్రియలో కొన్ని సడలింపులనిచ్చి గడువు పొడిగిస్తున్నట్లు పేర్కొంది. ఈ సంక్షోభం సమయంలో క్రీడాకారులు తమను తాము స్వీయ సిఫారసు చేసుకోవచ్చని తాజా ప్రకటనలో తెలియజేసింది. దరఖాస్తులను ఆన్లైన్లో పంపొచ్చని క్రీడా మంత్రిత్వ శాఖ తెలిపింది. భారత హాకీ దిగ్గజం ధ్యాన్చంద్ పుట్టినరోజైన ఆగస్టు 29న ఈ క్రీడా పురస్కారాలను ప్రదానం చేస్తారు.
ఇదీ చూడండి... మేరీకోమ్తో వివాదంపై యువ బాక్సర్ నిఖత్ స్పందన
