ప్రపంచ ఛాంపియన్షిప్లో స్వర్ణం నెగ్గి ఈ ఘనత సాధించిన భారత తొలి షట్లర్గా రికార్డు సృష్టించిన పీవీ సింధు తర్వాతి టోర్నీలపై దృష్టి పెట్టింది. ఈ టోర్నీలో పసిడి నెగ్గిన తర్వాత అందరి కళ్లు తనపైనే ఉంటాయని, నిలకడగా రాణించాలంటే వినూత్న వ్యూహాలతో ముందుకు వెళ్లాలని చెబుతోందీ తెలుగు అమ్మాయి.
ప్రపంచ ఛాంపియన్షిప్ నెగ్గిన తర్వాత బాధ్యత మరింత పెరిగిందని చెప్పింది సింధు.
"వరల్డ్ ఛాంపియన్ అయ్యాక అందరి కళ్లు నా పైనే ఉన్నాయి. ఈ విజయంతో నాపై మరింత ఒత్తిడి, బాధ్యత పెరిగాయి. కాబట్టి నేను ఇంకా కష్టపడాల్సి ఉంది. నా ఆటలో కొన్ని మార్పులు చేసి కోర్టులోకి వెళ్లే ప్రతి సారి వినూత్న వ్యూహాలతో బరిలో దిగాలి. ఈ గెలుపు కోసం ఐదేళ్ల నుంచి నిరీక్షిస్తున్నా. ఓడినప్పుడల్లా ఎంతో బాధపడేదాన్ని. అయితే శ్రమించడం మాత్రం ఆపలేదు. నేను ఈ స్థాయిలో ఉండడం కోసం నా తల్లిదండ్రలు ఎన్నో త్యాగాలు చేశారు" -పీవీ సింధు, భారత షట్లర్
ప్రస్తుతం ఈ నెలలో జరుగనున్న చైనా, కొరియా ఓపెన్లపైనే దృష్టిపెట్టానని చెబుతోంది సింధు.
"ఇప్పుడు చైనా, కొరియా ఓపెన్ కోసం సన్నాహాకమవుతున్నా. ఈ టోర్నీల్లో అత్యుత్తమ ప్రదర్శన చేసేందుకు ప్రయత్నిస్తా. ప్రపంచ ఛాంపియన్షిప్లో స్వర్ణం నెగ్గడం వల్ల నాలో ఆత్మవిశ్వాసం పెరిగింది. ఒలింపిక్స్ ముందు చాలా టోర్నీలున్నాయి. వాటిలో వంద శాతం ప్రయత్నించి ఒత్తిడిని అధిగమిస్తా" -పీవీ సింధు, భారత షట్లర్
కోచ్ గోపీచంద్ పర్యవేక్షణలో రాటుతేలానని, ఇతర దేశాల నుంచి నైపుణ్యం గల శిక్షకుల సాయం తీసుకుంటున్నామని చెప్పింది సింధు. మన దేశంలోనూ ఆ స్థాయిలో క్వాలిఫైయడ్ కోచ్లను ప్రోత్సహించాలని, అప్పుడే ఎక్కువ మంది ఛాంపియన్లు తయారవుతారని తెలిపింది సింధు.
ఈ నెల 17 నుంచి 22 వరకు చైనా ఓపెన్ జరుగనుంది. అనంతరం 24 నుంచి 29 వరకు కొరియా ఓపెన్లో తలపడనుంది పీవీ సింధు.
ఇదీ చదవండి: 'వారి మధ్య గొడవల్లేవు.. అభిప్రాయభేదాలే'
