చైనా, హాంకాంగ్, కొరియా మాస్టర్స్.. ఇలా వరుస టోర్నీల్లో విఫలమైన భారత షట్లర్లు కొంతమంది అంతర్జాతీయ మ్యాచ్లపై మరింత దృష్టిపెట్టారు. ఇందుకోసం జనవరి నుంచి జరగనున్న బ్యాడ్మింటన్ ప్రీమియర్ లీగ్కు(పీబీఎల్) దూరం కావాలని నిర్ణయించుకున్నారు. ఇప్పటికే సైనా నెహ్వాల్ ఈ టోర్నీ నుంచి తప్పుకోగా, తాజాగా ఈ జాబితాలోకి కిదాంబి శ్రీకాంత్ చేరాడు.
"ఇది చాలా కఠినమైన నిర్ణయం. నాపై చాలా అంచనాలు ఉన్నాయి. వాటిని నెరవేర్చాల్సిన అవసరం ఉంది. అందుకే అంతర్జాతీయ టోర్నీలపై దృష్టిపెట్టి, పీబీఎల్కు దూరం కావాలని నిర్ణయించుకున్నా. ఈ సీజన్లో బెంగళూరు ర్యాప్టర్స్ బాగా ఆడాలని కోరుకుంటున్నా.. ఆల్ ద బెస్ట్" -కిదాంబి శ్రీకాంత్, భారత షట్లర్
2017లో వరుసగా నాలుగు టైటిల్స్ నెగ్గిన శ్రీకాంత్, తర్వాత నుంచి వైఫల్యాలతో సతమతమవుతున్నాడు. ఈ ఏడాది ఇండియా ఓపెన్లో ఫైనల్స్కు వెళ్లడం మినహా మిగతా వాటిల్లో అంతగా ఆకట్టుకోలేకపోయాడు.
ఫిట్నెస్ లేమి, పేలవ ప్రదర్శనతో అంతర్జాతీయ టోర్నీల్లో ప్రభావం చూపలేకపోతున్నాడు శ్రీకాంత్. ఫలితంగా ర్యాంకింగ్స్లో 11కు దిగజారాడు.
2019 ఏప్రిల్ 29 నుంచి 2020 ఏప్రిల్ 20 వరకు జరిగిన అంతర్జాతీయ టోర్నీల్లో ప్రదర్శన, ర్యాంకింగ్స్ ఆధారంగా టోక్యో ఒలింపిక్స్కు భారత షట్లర్లు అర్హత సాధిస్తారు. వచ్చే ఏడాది ఏప్రిల్ 30న విశ్వక్రీడలకు సంబంధించిన జాబితాను ప్రకటిస్తారు. 2020 జులై 24 నుంచి ఆగస్టు 9 వరకు టోక్యోలో ఒలింపిక్స్ జరగనున్నాయి.
ఇదీ చదవండి: బీసీసీఐ రాజ్యంగ సవరణ వల్ల దాదాకే ప్రయోజనం!
