నేచురల్ స్టార్ నాని, రౌడీ బాయ్ విజయ్ దేవరకొండ వీళ్లిద్దరి కలయికలో వచ్చిన 'ఎవడే సుబ్రహ్మణ్యం' బాక్సాఫీస్‌ వద్ద మంచి ఆదరణ దక్కించుకుంది. అయితే అప్పటికి విజయ్ అంత పెద్ద హీరో కాకపోయినా.. 'అర్జున్‌రెడ్డి', 'గీత గోవిందం', 'టాక్సీవాలా' చిత్రాలతో స్టార్ హీరోగా ఎదిగిపోయాడు. మరోసారి వీరి ఇరువురి కలయికలో చిత్రమొస్తే ప్రేక్షకుల్లో భారీ అంచనాలుంటాయి. అయితే ఈ వార్త నిజమయ్యే సూచనలు కనిపిస్తున్నాయి.
ప్రముఖ నిర్మాత సురేశ్ బాబు ఈ చిత్రానికి నిర్మాణ బాధ్యతలు చేపడుతున్నట్టు ప్రచారం జరుగుతుంది. ప్రస్తుతం బాలీవుడ్‌లో విజయవంతంగా ప్రదర్శితమవుతోన్న అక్షయ్ కుమార్‌ - ధిల్జిత్‌ ధోసాంజె 'గుడ్న్యూస్' చిత్రాన్ని తెలుగులో నాని - దేవరకొండలతో రీమేక్ చేస్తే బాగుంటుందని ఆయన ఆలోచన చేస్తున్నారట. ఇప్పటికే ఈ సినిమా రీమేక్ హక్కులను సొంతం చేసుకునే పనిలో ఉన్నారని.. అన్నీ అనుకున్నట్లు కుదిరితే ఈ కథను నాని - రౌడీలతో తెరకెక్కించాలని అనుకుంటున్నారట.
ఇదీ కథ..
వరుణ్‌ బత్రా (అక్షయ్), దీప్తి బత్రా (కరీనా) భార్యాభర్తలు. సంతానం కలగకపోవడం వల్ల కృత్రిమ గర్భధారణ కోసం ఓ ఆసుపత్రిని సంప్రదిస్తారు. అలాంటి సమస్యతోనే హనీ బత్రా (దిల్జిత్‌), మోనికా బత్రా (కియారా) అదే ఆసుపత్రికి వస్తారు. అయితే రెండు జంటల ఇంటి పేర్లు బత్రానే కావడం వల్ల వైద్యులు పొరబడతారు. వరుణ్‌ శుక్రకణాలను మోనికా అండంతో, హనీ శుక్రకణాలను దీప్తి అండంతో ఫలదీకరణ చేస్తారు. ఈ కారణంగా వరుణ్‌ సంతానం మోనికా గర్భంలో, హనీ సంతానం దీప్తి గర్భంలో పెరుగుతుంటుంది. ఆ విషయం తెలిశాక వైద్యులు నాలిక్కరుచుకుంటారు. సంతానం కలగబోతోందంటూ గుడ్న్యూస్ చెప్పాల్సిన సమయంలో ఈ తారుమారు విషయాన్ని నీళ్లు నములుతూ చెబుతారు. అప్పుడు ఆ రెండు జంటలు ఎలా స్పందించాయి? సరిదిద్దుకోలేని ఈ తప్పిదం వారి జీవితాల్లో ఎలాంటి కల్లోలం సృష్టించింది? ఈ సమస్య ఎలా ముగిసింది? వంటి అంశాలతో ఆద్యంతం ఎంతో వినోదాత్మకంగా ఈ చిత్రాన్ని రూపొందించారు. ఈ మాతృకను హిందీలో రాజ్‌ మెహతా తెరకెక్కించారు.
ఇదీ చదవండి:- నెట్టింట వైరల్గా 'ఆర్ఆర్ఆర్' పోస్టర్
