బాలల హక్కులను పరిరక్షించేందుకు ఇప్పటికే యునిసెఫ్ రాయబారిగా సేవలందిస్తోంది బాలీవుడ్ నటి ప్రియాంక చోప్రా. తాజాగా యునిసెఫ్ తరపున మరో బాలీవుడ్ నటుడు పనిచేయనున్నాడు. చిన్నారులపై లైంగిక వేధింపులను అరికట్టేందుకు గళం విప్పనున్నాడు హీరో ఆయుష్మాన్ ఖురానా. ప్రజల్లో అవగాహన పెంచేందుకు ఐరాసలో అంతర్భాగమైన యునిసెఫ్తో పాటు భారత ప్రభుత్వంతో చేతులు కలిపాడు.
చిన్నారులపై అఘాయిత్యాలకు పాల్పడిన వారిని శిక్షించేందుకు ఏర్పాటు చేసిన పోక్సో చట్టానికి ప్రచారం కల్పించనున్నాడు ఆయుష్మాన్. ఈ మేరకు కేంద్ర మహిళ, శిశు సంక్షేమ మంత్రిత్వ శాఖ ఈ బాలీవుడ్ నటుడి ద్వారా ప్రజల్లో చైతన్యం తీసుకురానుంది.
"సామాజిక బాధ్యత ఉన్న పౌరుడిగా ఈ విషయంపై ప్రజల్లో అవగాహన కల్పించాలనుకుంటున్నా. పోక్సో చట్టంలో ఉన్న న్యాయపరమైన అంశాలపై ప్రజల్లో చైతన్యం కలిగిస్తా. పిల్లలపై అఘాయిత్యాలు చేయడం దారుణమైన చర్య. లైంగిక వేధింపులకు గురైన చిన్నారులకు న్యాయపరమైన మద్దతు దొరకాల్సిన ఆవశ్యకత ఎంతైనా ఉంది. ఇందుకోసం కృషి చేస్తున్న యునిసెఫ్, భారత ప్రభుత్వానికి నా అభినందనలు" - ఆయుష్మాన్ ఖురానా, బాలీవుడ్ హీరో.
సామాజిక మాధ్యమాలు, సినిమా థియేటర్లు, ప్రసార మాధ్యమాల్లో ఆయుష్మాన్ ఈ క్యాంపైన్ నిర్వహించనున్నాడు.
ఇదీ చదవండి: ఆర్ఆర్ఆర్: తారక 'భీముడి' తొలి దర్శనం నేడే!
