హాలీవుడ్‌ యాక్షన్ హీరో టామ్ క్రూజ్ లగ్జరీ కారు 'బీఎమ్డబ్ల్యూ ఎక్స్ 7' చోరీకి గురైంది. ప్రస్తుతం ఆయన నటిస్తున్న 'మిషన్: ఇమ్పాజిబుల్ 7' షూటింగ్ సమయంలో ఆయన వాహనాన్ని ఓ బడా హోటల్ ముందు పార్కింగ్ చేయగా సాంకేతిక పరిజ్ఞానాన్ని వినియోగించి సినీఫక్కీ తరహాలో దొంగలు ఎత్తుకెళ్లారు. అందులో ఉన్న వేల పౌండ్లు విలువైన లగేజ్ బ్యాగ్ను తీసుకెళ్లారు. ఈ విషయం తెలిసిన క్రూజ్కు విపరీతమైన కోపం వచ్చిందట. ఈ సంఘటనను అక్కడి ఓ వార్తా సంస్థ తెలిపింది.
సమాచారం అందుకున్న పోలీసులు కేసు నమోదు చేసి దొంగలను పట్టుకున్నారు. కారులో ఉన్న ఎలక్ట్రానిక్ ట్రాకింగ్ డివైస్ ద్వారా వాహనాన్నికనుగొన్నారు. కానీ అందులో ఉన్న లగేజ్ బ్యాగ్ను ఇంకా స్వాధీనం చేసుకోలేదు.
'మిషన్ ఇంపాజిబుల్' సిరీస్ నుంచి ఇప్పటివరకు ఆరు భాగాలు వచ్చాయి. ఏడో భాగం సెట్స్‌పై ఉంది. శరవేగంగా షూటింగ్ జరుపుకుంటోంది. అన్ని భాగాల్లోనూ హీరోగా నటిస్తూ వస్తున్న టామ్ క్రూజ్ (Tom Cruise) ఇందులోనూ హీరోగా నటిస్తున్నాడు. యాక్షన్ డ్రామాగా తీస్తున్న ఈ చిత్రానికి క్రిస్టోఫర్ మెక్‌క్వారీ దర్శకత్వం వహిస్తున్నారు. ఇందులో వింగ్ రేమ్స్, రెబెకా ఫెర్గూసన్, వెనెస్సా కిర్బీ, హేలే అట్వెల్, హెన్రీ సెర్నీ తదితరులు ఇతర పాత్రలు పోషిస్తున్నారు. వచ్చే ఏడాది ఈ చిత్రాన్ని విడుదల చేయటానికి నిర్మాణ సంస్థ సన్నాహాలు చేస్తోంది.
ఇదీ చూడండి: సిబ్బందిని తిట్టిన హీరో.. తప్పుకున్న ఐదుగురు!
