తెలుగులో సినిమా తీశారు. హిట్ కొట్టారు. వావ్ అనిపించారు. కానీ అంతటితో ఊరుకోలేదు. వాళ్ల చూపు బాలీవుడ్పై పడింది. అక్కడా తమ ప్రతిభ చూపేందుకు సిద్ధమయ్యారు. షూటింగ్లతో కొందరు బిజీగా ఉండగా, మరికొందరు ఇప్పటికే హిట్లు కొట్టి శెభాష్ అనిపించుకున్నారు. ఇంతకీ ఆ దర్శకులు ఎవరు? ఏయే ప్రాజెక్టులు చేస్తున్నారు? అనే విషయాలు తెలుసుకుందాం.
'కబీర్ సింగ్'తో సందీప్
విజయ్ దేవరకొండ 'అర్జున్ రెడ్డి'.. టాలీవుడ్లో సెన్సేషన్ సృష్టించింది. అదే సినిమాను హిందీలో షాహిద్ కపూర్తో 'కబీర్ సింగ్'గా తీశారు దర్శకుడు సందీప్ రెడ్డి వంగా. గతేడాది థియేటర్లలో విడుదలైన ఈ చిత్రం.. ప్రేక్షకులను అలరించడం సహా బాక్సాఫీసు దగ్గర దుమ్ములేపింది. దాదాపు రూ.300 కోట్ల వసూళ్లు సాధించింది. దీంతో సందీప్.. టాలీవుడ్తో పాటు బాలీవుడ్లోనూ ఫేమస్ అయిపోయారు.
'దుర్గామతి'తో అశోక్
కథానాయిక ప్రాధాన్య కథతో రూపొందిన చిత్రం 'భాగమతి'. స్వీటీ అనుష్క శెట్టి టైటిల్ రోల్లో అదరగొట్టింది. జి.అశోక్ దర్శకుడిగా ఆకట్టుకున్నారు. ఈ సినిమాను 'దుర్గామతి' పేరుతో బాలీవుడ్లో రీమేక్ చేసి, ఇటీవల ఓటీటీలో విడుదల కూడా చేశారు. భూమి పెడ్నేకర్, అనుష్క చేసిన పాత్రలో నటించింది. అయితే ఈ సినిమాకు వీక్షకుల నుంచి మిశ్రమ స్పందన లభిస్తోంది. కానీ అశోక్ దర్శకత్వ ప్రతిభ బాలీవుడ్లోనూ మెరిసింది.
'జెర్సీ'తో గౌతమ్
క్రికెట్ కథలతో టాలీవుడ్లో వచ్చిన సినిమాల్లో ది బెస్ట్ అంటే 'జెర్సీ' అనే చెప్పాలి. నేచురల్ స్టార్ నాని, తన అద్భుత నటనతో కంటతడి పెట్టించారు. అనిరుధ్, తన సంగీతంతో ప్రతి సీన్లోనూ లీనమయ్యేలా చేశారు. గౌతమ్ తిన్ననూరికి దర్శకుడిగా ఇది రెండో సినిమా అయినప్పటికీ ఎంతో అనుభవం ఉన్నవాడిలా తీసి అందరి చేత శెభాష్ అనిపించుకున్నారు. బాలీవుడ్లో ఈ సినిమాను షాహిద్ కపూర్ హీరోగా తీస్తున్నారు. ఇటీవల షూటింగ్ పూర్తయింది. త్వరలో విడుదల కానుంది. మరి అక్కడ గౌతమ్ ఎలాంటి ఫలితాన్ని అందుకుంటారో?
'హిట్'తో శైలేష్
ఈ ఏడాది మార్చిలో విడుదలైన మిస్టరీ థ్రిల్లర్ 'హిట్'. విశ్వక్సేన్ హీరోగా చేయగా, శైలేష్ కొలను దర్శకుడిగా పరిచయమయ్యారు. దీనికి వచ్చిన ఆదరణ చూసి, బాలీవుడ్లోనూ తీసేందుకు నిర్మాతలు దిల్రాజు, అల్లు అరవింద్ సిద్ధమయ్యారు. రాజ్కుమార్ రావ్తో హిందీలో ఈ సినిమా రీమేక్ చేస్తున్నట్లు ప్రకటించారు. ప్రస్తుతం షూటింగ్ జరుగుతుండగా, వచ్చే ఏడాది వేసవిలో థియేటర్లలో విడుదల కానుంది. మరి శైలేష్ అక్కడ కూడా 'హిట్' కొడతారో లేదో చూడాలి.
'ఛత్రపతి' రీమేక్తో వినాయక్
ఎన్నో హిట్ సినిమాలతో టాలీవుడ్లో స్టార్ డైరెక్టర్గా గుర్తింపు తెచ్చుకున్నారు వీవీ వినాయక్. కానీ సినీ పరిశ్రమలోకి అడుగుపెట్టిన చాన్నాళ్లకు బాలీవుడ్ ఎంట్రీ ఇస్తున్నారు. ప్రస్తుతం 'ఛత్రపతి' రీమేక్ పనుల్లో బిజీగా ఉన్నారు. త్వరలో షూటింగ్ ప్రారంభం కానుంది. ఇదే సినిమాతో బెల్లంకొండ శ్రీనివాస్.. హీరోగా బాలీవుడ్కు పరిచయమవుతున్నారు. మరి వీరి ద్వయం హిందీ ప్రేక్షకుల్ని ఎలా మెప్పిస్తుందో చూడాలి.
