బాలీవుడ్లో యాక్షన్ చిత్రాలతో మంచి జోరుమీదున్న యువ కథానాయకుడు టైగర్ ష్రాఫ్(tiger shroff). ప్రస్తుతం ఆయన నుంచి రెండు చిత్రాలు సిద్ధమవుతున్నాయి. ఒకటి 'హీరో పంటి 2', రెండోది 'గణ్పథ్'(tiger shroff ganapath). ఈ రెండింటి పైనా మంచి అంచనాలున్నాయి. తాజాగా 'గణ్పథ్' చిత్ర కథ గురించి ఆసక్తికరమైన విషయం బయటకొచ్చింది. 'ఈ చిత్రం 2090 నేపథ్యంలో సాగుతుంది. భవిష్యత్తుకు సంబంధించిన కాల్పనిక కథాంశంతో రూపుదిద్దుకుంటోంది. యుద్ధాలు, ప్రకృతి విపత్తుల కారణంగా ప్రపంచం ఏవిధంగా ధ్వంసమైపోతుందో ఇందులో చూపించనున్నారు. దర్శకుడు వికాస్ భళ్ ఈ చిత్రం కోసం చాలా కష్టపడుతున్నారు. నిర్మాతలు ఖర్చు విషయంలో ఎక్కడా వెనకాడటం లేదు' అని బాలీవుడ్ వర్గాల సమాచారం.
ఇదే నిజమైతే ఈ చిత్రం ప్రేక్షకులకు కచ్చితంగా నచ్చుతుందని.. భారీ స్థాయి విజువల్ హంగులతో కూడిన ఇలాంటి చిత్రాలే కొవిడ్ పరిస్థితుల తర్వాత ప్రేక్షకుల్ని థియేటర్లకు రప్పించగలవు అని ట్రేడ్ విశ్లేషకులు భావిస్తున్నారు. ఇందులో కృతి సనన్ కథానాయిక. అక్టోబరు నుంచి ఈ చిత్రం సైట్స్పైకి వెళ్లనుంది. 2022 డిసెంబరు 23న ఈ చిత్రాన్ని విడుదల చేయనున్నట్టు ఇప్పటికే ప్రకటించారు.
ఇదీ చూడండి : అల్లు అర్జున్ మరో రికార్డు.. తొలి దక్షిణాది నటుడిగా!
