The Kashmir Files: ఎలాంటి అంచనాలు లేకుండానే విడుదలై సూపర్హిట్గా నిలిచింది 'ద కశ్మీర్ ఫైల్స్'. 90వ దశకంలో కశ్మీర్ పండిట్లపై జరిగిన హత్యకాండకు సంబంధించిన కథాంశంతో ఈ సినిమాను తెరకెక్కించారు. ప్రస్తుతం దేశవ్యాప్తంగా ఈ మూవీ గురించే చర్చ జరుగుతోంది. మార్చి 11న విడుదలైన ఈ మూవీ బాక్సాఫీస్ వద్ద కలెక్షన్ల వర్షం కురిపిస్తోంది. అయితే, ఈ సినిమాని పూర్తి చేయటం అంత సులభమేమీ కాలేదంటున్నారు నిర్మాతలు. త్రివర్ణ పతాకాన్ని ఉగ్రవాదులు ధ్వంసం చేయటం వంటి దృశ్యాల చిత్రీకరణ సమయంలో సెట్ల వద్ద గందరగోళ పరిస్థితులు తలెత్తి పెద్ద సవాలుగా మారినట్లు చెప్పారు. ఈ అంశంపై పలు విషయాలను ఈటీవీ భారత్తో చెప్పారు ద కశ్మీర్ ఫైల్స్ లైన్ ప్రొడ్యూసర్ పర్వ్ బాలి.
" కశ్మీర్ లాల్చౌక్ వద్ద త్రివర్ణ పతాకాన్ని ఉగ్రవాదులు దూరంగా పడేసే సన్నివేశాన్ని ముస్సోరిలోని లాల్తిబ్బా ప్రాంతంలో తీశాం. దానిని స్థానిక ప్రజలు వ్యతిరేకించారు. అలాంటి దృశ్యాలను ఏ భారతీయుడు సహించడు. ముస్సోరీ ప్రజలను ఒప్పించేందుకు చాలా ఇబ్బందులు పడ్డాం. అందుకు ఏ ఒక్కరూ అంగీకరించేందుకు సిద్ధపడలేదు. ఆ సమయంలో ఏం జరుగుతోందనేది అర్థం చేసుకునే పరిస్థితుల్లో ఒక్కరు కూడా లేరు. అలాగే.. 1990లో కశ్మీర్ లోయలో జరిగిన ఉగ్ర చర్య సందర్భంగా కశ్మీర్ సెంటిమెంట్ను పునర్నిర్మించేందుకు గోడలపై భారత వ్యతిరేక నినాదాలను రాయటమూ.. ఆందోళనలకు దారి తీసింది."
- పర్వ్ బాలి, ద కశ్మీర్ ఫైల్స్ లైన్ ప్రొడ్యూసర్
సినిమా విడుదలై ప్రేక్షకుల నుంచి మంచి స్పందన వస్తున్న క్రమంలో చిత్రీకరణలో ఎదుర్కొన్న ఇబ్బందులను నిర్మాతలు మర్చిపోయారు. చాలా రాష్ట్రాల్లో సినిమాకు వినోద పన్ను రద్దు చేశారు. ఆనాటి హింసకాండను పునర్నిర్మించినందుకు ప్రధాని మోదీ సైతం ప్రశంసించారు.
హిమాచల్ నుంచి ఉత్తరాఖండ్కు..
ద కశ్మీర్ ఫైల్స్ సినిమాను ముందుగా హిమాచల్ప్రదేశ్లో చిత్రీకరించాలనుకుంది చిత్ర యూనిట్. అయితే, ఉత్తరాఖండ్లో ఎక్కువ భాగం నిర్మించారు. దెహ్రాదూన్, ముస్సోరీలోనే చాలా వరకు చిత్రీకరణ పూర్తిచేశారు. ఈ సినిమాకు లైన్ ప్రొడక్షన్ పనులను దెహ్రాదూన్కు చెందిన ద బజ్ మేకర్స్ చూసుకుంది. ఈ చిత్రం మూడేళ్ల క్రితం ప్రారంభించినట్లు తెలిపారు మరో లైన్ ప్రొడ్యూసర్ గౌరవ్ గౌతమ్. హిమాచల్లో చిత్రీకరించాలని నిర్ణయించినప్పటికీ.. ఉత్తరాఖండ్లో చేపట్టాలని దర్శకుడు వివేక్ రంజన్ అగ్నిహోత్రిని ద బజ్ మేకర్స్ కోరటం వల్ల అక్కడికి మార్చినట్లు చెప్పారు. ముస్సోరీలోని చాలా ప్రాంతాలు కశ్మీర్ను తలపిస్తాయని, ముస్సోరీ లైబ్రరీ ప్రాంతం కశ్మీర్లోని లాల్ చౌక్ మాదిరిగా ఉండటం వల్ల చిత్రీకరణను అక్కడికి మార్చినట్లు తెలిపారు. కశ్మీర్ ఫైల్స్ సినిమాలోని లాల్ చౌక్ దృశ్యం చాలా ఫేమస్. అనుపమ్ కేర్ అక్కడే పరిచయమవుతారు. ఆ దృశ్యాలను ముస్సోరీలోని లైబ్రరీ చౌక్లో తీశారు. అది లాల్ చౌకా లేక లైబ్రరీ చౌకా అనేది గుర్తుపట్టటం చాలా క్లిష్ఠమని చెప్పారు గౌరవ్.
ఉత్తరాఖండ్ అప్పటి ముఖ్యమంత్రి త్రివేండ్ర సింగ్ రావత్ నేతృత్వంలోని అధికార యంత్రాంగం తమకు చాలా మద్దతుగా నిలిచినట్లు ద బజ్ మేకర్స్ పేర్కొంది. ఈ చిత్రంలో ఉత్తరాఖండ్ ప్రజలకు జూనియర్ ఆర్టిస్టులు, ఇతర క్యారెక్టర్ ఆర్టిస్టులుగా అవకాశం లభించినట్లు చెప్పారు.
ఇదీ చూడండి:
