హీరో రామ్.. మాస్ లుక్లో కనిపించి, అలరించిన సినిమా 'ఇస్మార్ట్ శంకర్'. చాలా కాలం తర్వాత ఈ చిత్రంతో దర్శకుడు పూరీ జగన్నాథ్ సూపర్హిట్ అందుకున్నారు. దాదాపు రూ.80 కోట్లకుపైగా కలెక్షన్లు సాధించిందీ చిత్రం. ఈ చిత్ర హిందీ డబ్బింగ్ వెర్షన్కు యూట్యూబ్లో విశేషాదరణ లభిస్తోంది. ఆదిత్య మూవీస్ యూట్యూబ్ ఛానల్లో ఇప్పటివరకు ఈ సినిమాకు 200 మిలియన్ వ్యూస్ వచ్చాయి.
'ఇస్మార్ట్ శంకర్' సూపర్హిట్ కావడం వల్ల ఈ చిత్రానికి కొనసాగింపుగా సీక్వెల్ను రూపొందిస్తారని గతంలో ఊహాగానాలు వినిపించాయి. కొత్త సినిమా కోసం పూరీ జగన్నాథ్ ఇప్పటికే స్టోరీ సిద్ధం చేసినట్లు టాక్. 'ఇస్మార్ట్..'లో నటించిన హీరోయిన్లు నభా నటేష్, నిధి అగర్వాల్.. సీక్వెల్లోనూ కనిపిస్తారని తెలుస్తోంది.
హీరో రామ్ ప్రస్తుతం లింగుస్వామి దర్శకత్వంలో రూపొందుతోన్న చిత్రంలో నటిస్తున్నారు. ఇందులో కృతిశెట్టి కథానాయిక. మరోవైపు దర్శకుడు పూరీజగన్నాథ్.. విజయ్ దేవరకొండతో 'లైగర్' అనే చిత్రాన్ని తెరకెక్కిస్తున్నారు. ఇందులో విజయ్ సరసన బాలీవుడ్ బ్యూటీ అనన్యా పాండే నటిస్తోంది. శరవేగంగా షూటింగ్ పూర్తి చేసుకుంటోన్న 'లైగర్' సినిమా త్వరలోనే ప్రేక్షకుల ముందుకు రానుంది.
ఇదీ చూడండి: 'ఇస్మార్ట్ శంకర్'గా రణ్వీర్ సింగ్!
