చిన్నప్పటి నుంచి సినిమాపై ఉన్న అమితమైన మక్కువతో ఎంతోకాలం క్రితం పరిశ్రమలోకి అడుగుపెట్టి ప్రొడక్షన్‌ మేనేజర్‌గా విధులు నిర్వర్తించి ఎంతోమంది దర్శకులు వద్ద వర్క్‌ చేశారు యుగంధర్‌. ఆయన దర్శకత్వంలో తొలి ప్రయత్నంగా తెరకెక్కిన చిత్రం 'ఇప్పుడు కాక ఇంకెప్పుడు'. హస్వంత్ వంగ, నమ్రతా దరేకర్, వశిష్ట చౌదరి ప్రధాన పాత్రల్లో నటించిన ఈ సినిమా మరో రెండు రోజుల్లో ప్రేక్షకుల ముందుకు రానుంది. ఈ నేపథ్యంలో 'ఇప్పుడు కాక ఇంకెప్పుడు' దర్శకుడు యుగంధర్‌.. తన సినిమా గురించి ఎన్నో ఆసక్తికర విశేషాలు పంచుకున్నారు. ఆ విశేషాలు మీకోసం..
సినీ ప్రయాణమిలా..:
మాది ఆంధ్రప్రదేశ్‌లోని పశ్చిమగోదావరి జిల్లాలోగల లక్ష్మిపురం అనే చిన్న పల్లెటూరు. చిన్నప్పటి నుంచి నాకు సినిమాపై ఎంతో ఆసక్తి ఉండేది. ఎలాగైనా సరే పరిశ్రమలోకి అడుగుపెట్టాలనే కోరిక ఉండేది. అలాంటి తరుణంలో సుమారు 14 సంవత్సరాల క్రితం పరిశ్రమవైపు అడుగులేశాను. మొదటి ప్రయత్నంలోనే ప్రొడెక్షన్‌ మేనేజర్‌గా విధులు నిర్వర్తించే అవకాశం నన్ను వరించింది. అలా, కెరీర్‌ ప్రారంభించాను.
శ్రీహరి సినిమాలు..:
శ్రీహరి నటించిన ఎన్నో చిత్రాలకు ప్రొడెక్షన్‌ మేనేజర్‌గా పనిచేశాను. 'దాస్‌', 'ఒరేయ్‌ తమ్ముడు', 'పృథ్వీనారాయణ', 'రాధాగోపాలం' 'ఒట్టేసి చెబుతున్నా', 'రామ్‌' వంటి చిత్రాలకు నేనే ప్రొడక్షన్‌ మేనేజర్‌. ఓ సినిమాకు సంబంధించిన అన్ని విభాగాలపై ప్రొడక్షన్‌ మేనేజర్‌కు పట్టు ఉంటుంది. అలాంటి పోస్ట్‌లో నేను కూడా కొంతకాలంపాటు భాగమైనందుకు ఎంతో ఆనందిస్తున్నాను.
ఆ సినిమా తర్వాతే..:
ప్రొడక్షన్‌ మేనేజర్‌గా సుమారు 20 సినిమాలకు పనిచేశాను. 2012లో విడుదలైన 'సోలో' చిత్రానికి చివరిసారిగా ప్రొడక్షన్‌ మేనేజర్‌గా బాధ్యతలు నిర్వర్తించా. ఆ సినిమా తర్వాత దర్శకుడిగా మారాలని గట్టిగా నిర్ణయించుకున్నా. కథలు కూడా రాశా. ఈ క్రమంలోనే సుమారు 3 ఏళ్లు ఇబ్బందులు పడ్డాం.
డైరెక్షన్‌.. గౌరవం:
డైరెక్షన్‌ డిపార్ట్‌మెంట్‌ అంటే నాకు అమితమైన అభిమానం. డైరెక్టర్‌ అంటే గౌరవం. ఇండస్ట్రీలో ఉన్న ప్రతి ఒక్క డైరెక్టర్‌ నుంచి ఎన్నో విషయాలు నేర్చుకున్నా. ఇప్పటికీ నేర్చుకుంటూనే ఉన్నా. ముఖ్యంగా బాపుగారు, పీ వాసు అంటే అమితమైన గౌరవం ఉంది.
నన్ను నేను నిరూపించుకోవడానికి..:
పరిశ్రమలో ఉన్న పలువురు పెద్ద హీరోల కోసం కథలు సిద్ధం చేశాను. అయితే ముందు దర్శకుడిగా నన్ను నేను నిరూపించుకోవడానికే 'ఇప్పుడు కాక ఇంకెప్పుడు' కథ రాశాను. హీరో హీరోయిన్స్‌ని ఎంచుకుని త్వరగానే షూట్‌ ప్రారంభించా. కరోనా ఫస్ట్‌ వేవ్‌ పూర్తి కాగానే విడుదల చేయాలని నిర్ణయించుకున్నాం. కాకపోతే రీ రికార్డింగ్‌ వల్ల కొంత ఆలస్యమైంది. ఈక్రమంలోనే సెకండ్‌ వేవ్‌ వల్ల మరలా వాయిదా పడింది.
బోల్డ్ కాదు.. ఎరోటిక్‌:
మా ఈ చిత్రం 'ఇప్పుడు కాక ఇంకెప్పుడు' ట్రైలర్‌లో కొన్ని సన్నివేశాలు చూసి ఇది బోల్డ్ చిత్రమని అందరూ చెప్పుకొంటున్నారు. నిజం చెప్పాలంటే అవి బోల్డ్ సీన్లు కాదు. కేవలం ఎరోటిక్‌ సన్నివేశాలు మాత్రమే. తల్లిదండ్రులకు పిల్లలకు మధ్య ఉండే అనుబంధాన్ని చూపిస్తూ.. తెరకెక్కించిన ఫీల్‌గుడ్‌ సినిమా ఇది.
వివాదం సద్దుమణిగింది..:
ట్రైలర్‌లో చూపించిన కొన్ని సన్నివేశాల్లో బ్యాక్‌గ్రౌండ్‌లో 'భజగోవిందం' అనే పదాలు వినిపించడం వల్ల కొంతమంది చర్చలు లేవనెత్తారు. నిజం చెప్పాలంటే ఈ సినిమా టైటిల్‌ సాంగ్‌లో 'భజగోవిందం' అనే రెండు లైన్లు వస్తాయి. ఇప్పుడు ఆ లైన్లను మ్యూట్‌ చేయించా. అయితే, పదిరోజుల క్రితమే సినిమా టైటిల్‌ సాంగ్‌ విడుదల చేశాం. అప్పుడు ఎవరూ ఇబ్బందిపడలేదు. కానీ ఇప్పుడు మాత్రం అభ్యంతరాలు వ్యక్తం చేస్తున్నారు.
ఇప్పటివరకూ అలాంటి సీక్వెన్స్ రాలేదు..:
సినిమాలో మొదటిసారి హీరోహీరోయిన్స్‌ కలుసుకున్నప్పుడు ట్రైన్‌ సీక్వెన్స్ వస్తుంది. సుమారు 6 నిమిషాలపాటు ఆ సీక్వెన్స్ ఉంటుంది. ఇప్పటివరకూ ఎవరూ అలాంటి సీక్వెన్స్ చూపించి ఉండదు. ఆ సీన్‌లో ఎలాంటి డైలాగ్‌లు ఉండవు. కానీ అది థియేటర్‌లో వచ్చినప్పుడు ప్రేక్షకులు సైలెంట్‌గా మాత్రం ఉండరు.
