హీరో తరుణ్, రిచా జంటగా కె.విజయ్ భాస్కర్ దర్శకత్వంలో తెరకెక్కిన బ్లాక్‌బస్టర్‌ చిత్రం 'నువ్వే కావాలి'. ఉషాకిరణ్ మూవీస్ నిర్మించిన ఈ చిత్రం నేటితో (అక్టోబరు 13) 20 వసంతాలు పూర్తి చేసుకుంది. తరుణ్-రిచాల నటన, విజయ్ భాస్కర్ టేకింగ్‌, త్రివిక్రమ్‌ రచనా శైలితో పాటు, సంగీత దర్శకుడు కోటి అందించిన స్వరాలు యువతనే కాదు, అన్ని వర్గాల ప్రేక్షకులను విశేషంగా ఆకట్టుకున్నాయి. ఈ సందర్భంగా హీరో తరుణ్ చిత్రవిశేషాలను 'ఈటీవీ భారత్'తో ప్రత్యేకంగా పంచుకున్నారు.
"సినిమా ఇంత పెద్ద సక్సెస్ అవుతుందని అనుకోలేదు. తొలి సినిమా సక్సెస్ అవ్వడం అనేది అదృష్టం. విజయ్ భాస్కర్, రవికిశోర్, రామోజీరావు, రిచా, కోటి సహా చిత్రబృందానికి ధన్యవాదాలు. అయితే ఈ సినిమా తొలి రోజు షూటింగ్లో పాల్గొనేటప్పుడు 104 డిగ్రీల జ్వరం వచ్చింది. భయమో ఏమో తెలీదు కానీ అలా వచ్చింది. ఈ సినిమా సిల్వర్ జుబ్లీ వేడుకలో "మూవీ చూస్తున్నపుడు ఎటువంటి విషాదం లేకుండా కళ్లలో నీళ్లు వచ్చాయి" అని చిరంజీవి అన్నారు. 'కళ్లలోకి కళ్లు పెట్టి చూడవెందుకు' పాట చిత్రీకరణలో నాకు నిజంగా కళ్లలో నీళ్లు వచ్చాయి. ఇప్పటికీ ఆ పాట విన్నప్పుడు ఓ చిన్న ఫీల్ కలుగుతుంది. మొత్తంగా ఇది గుండెకు హత్తుకుపోయే సినిమా. 2021లో నా పుట్టినరోజున కొత్త సినిమా గురించి ప్రకటిస్తా. ప్రస్తుతం స్క్రిప్ట్ వర్క్ జరుగుతోంది. మరోసారి చిత్రబృందానికి నా ధన్యావాదాలు" అని తన మనసులోని మాటల్ని పంచుకున్నారు తరుణ్.
కరోనాను తేలికగా తీసుకోవద్దని ప్రజలకు సూచించారు తరుణ్. వచ్చే ఏడాది నాటికి వైరస్ తగ్గుముఖం పట్టి అంతా బాగుంటారని ఆశాభావం వ్యక్తం చేశారు.
ఇదీ చూడండి 'నువ్వే కావాలి' కోసం నేను, రిచా అలా: తరుణ్
