గతంలో తాను అంగీకరించిన ఓ సినిమా నుంచి తనను తప్పించినట్లు బాలీవుడ్ నటి తాప్సీ(Taapsee Pannu) ఆరోపించారు. కథ నచ్చి డేట్స్ ఇచ్చినా.. తర్వాత సినిమా నుంచి చెప్పకుండా తీసేశారని ఆమె ఆవేదన వ్యక్తం చేశారు. అయితే తనను తప్పించడానికి కారణమేంటో ఇప్పటివరకు తెలియదని ఇటీవలే ఓ ఇంటర్వ్యూలో వెల్లడించారు.
"ఓ సినిమాలోని పాత్ర కోసం నిర్మాతలు నన్ను సంప్రదించారు. కథ నచ్చి డేట్స్ కూడా ఇచ్చేశాను. అంతలోనే ఆ చిత్రం నుంచి నన్ను తప్పించారని మీడియా ద్వారా తెలిసింది. వారు నన్ను తర్వాత కలిసి, క్షమాపణలు చెప్పారు. అయితే వారి నుంచి నేను క్షమాపణ కోరలేదు. కానీ, నటించేందుకు నేను సిద్ధపడినా.. ఆ సినిమాలో నుంచి నన్ను ఎందుకు తప్పించారో కారణం చెప్పలేదు".
- తాప్సీ, బాలీవుడ్ కథానాయిక
అయితే అది ఏ సినిమా అనేదానిపై హీరోయిన్ తాప్సీ స్పష్టత ఇవ్వలేదు. కానీ, బాలీవుడ్లో రెండేళ్ల క్రితం విడుదలైన 'పతి పత్ని ఔర్ వో'(taapsee pati patni aur woh) గురించి ఆమె పరోక్షంగా మాట్లాడారని తెలుస్తోంది. 2019లో ప్రేక్షకుల ముందుకొచ్చిన ఈ చిత్రంలో కార్తిక్ ఆర్యన్, భూమి పెడ్నేకర్, అనన్యా పాండే ప్రధానపాత్రల్లో నటించారు. ఈ సినిమాకు ముదస్సార్ అజీజ్ దర్శకత్వం వహించగా.. భూషణ్ కుమార్, జూనో చోప్రా, కృష్ణన్ కుమార్ నిర్మాతలుగా వ్యవహరించారు.
నిర్మాతల స్పందన
అయితే తాప్సీ చేసిన ఆరోపణలపై స్పందించిన 'పతి పత్నీ ఔర్ వో' నిర్మాతలు భూషణ్ కుమార్, జూనో చోప్రా.. ఆ సినిమా నుంచి తాప్సీని తప్పించడంపై స్పష్టత ఇచ్చారు. "చిత్రసీమలో ప్రతి దర్శకనిర్మాతలు చేసినట్లే.. మేము కూడా స్క్రిప్ట్ వర్క్ పూర్తయిన తర్వాత నటీనటుల కోసం సంప్రదింపులు జరిపాం. ఆ సినిమా కోసం అనేక స్టార్ నటీనటులతో మంతనాలు జరిపాం. ఈ నేపథ్యంలో ఓ హీరోయిన్ పాత్ర కోసం తాప్సీని సంప్రదించిన మాట నిజమే. అయితే చివరికి ఆ పాత్ర కోసం తాప్సీని ఖరారు చేయలేదు. అయినా కథ డిమాండ్ను బట్టి నటీనటుల ఎంపిక అనేది ఉంటుంది. కానీ, తాప్సీ.. పరిశ్రమలో ప్రతిభావంతురాలు. భవిష్యత్లో తాప్సీతో కలిసి పనిచేసేందుకు మేము సిద్ధంగా ఉన్నాం" అని నిర్మాతలు వెల్లడించారు.
తాప్సీ నటించిన 'హసీన్ దిల్రూబా' జులై 2న నెట్ఫ్లిక్స్(haseen dillruba on netflix) ద్వారా ప్రేక్షకుల ముందుకు రానుంది. ఇందులో తాప్సీతో పాటు విక్రాంత్ మాస్సే, హర్షవర్ధన్ రాణేలు నటించారు. ఈ సినిమాకు వినీల్ మ్యాథ్యూ దర్శకత్వం వహించారు.
ఇదీ చూడండి.. తాప్సీతో రొమాంటిక్ సీన్స్.. భయపడిన ఆ హీరోలు
