జూన్ 14.. భారతీయ సినీ ప్రేక్షకులు ఒక్కసారిగా ఉలిక్కిపడ్డారు. ఎంతో భవిష్యత్తు ఉన్న బాలీవుడ్ వర్ధమాన నటుడు సుశాంత్ సింగ్ రాజ్పుత్ ఆత్మహత్య చేసుకోవడమేంటి? అసలు ఇలా ఎందుకు చేశాడు? బాలీవుడ్లోని నెపోటిజమే దీనికి కారణమా? అంటూ తమ అభిప్రాయాల్ని పంచుకున్నారు. అలా అప్పడు మొదలైన ఈ చర్చ.. ఇప్పటికీ నడుస్తూనే ఉంది. గతంలో ఏ బాలీవుడ్ నటుడు చనిపోయినప్పుడు కూడా ఇంతలా మాట్లాడుకుని ఉండరేమో!
సరిగ్గా ఇదే సమయంలో సుశాంత్ చివరి చిత్రం 'దిల్ బెచారా' విడుదల తేదీని ప్రకటించారు. ఆ క్షణం నుంచి ఆరాధ్య నటుడు తమ మధ్య లేకపోయినా సరే సినిమాపై లెక్కలేనంత ప్రేమను కురిపించారు అభిమానులు. ట్రైలర్తో ఏకంగా ప్రపంచ రికార్డునే నెలకొల్పారు. సినిమాను అదేస్థాయిలో హిట్ చేసేందుకు సిద్ధమవుతున్నారు. కానీ కరోనా ప్రభావంతో దీనిని థియేటర్లలో కాకుండా ఓటీటీలో విడుదల చేస్తుండటం వారికి కాస్త బాధ కలిగించింది. కానీ సుశాంత్ను ఆఖరిసారి చూడనున్నామనే ఆనందంలో ఈ విషయాన్ని అసలు పట్టించుకోవడమే లేదు. మరి డిజిటల్ మాధ్యమాల్లో 'దిల్ బెచారా' సినిమా ప్రపంచ రికార్డులు అందుకోనుందా? సరికొత్త మైలురాయిని ఏమైనా సృష్టించనుందా? అనేది తెలియాలంటే మరికొద్ది రోజులు ఎదురుచూడాల్సిందే.
హాలీవుడ్ చిత్రాల్ని అధిగమించిన ట్రైలర్
మూడేళ్ల క్రితమే 'దిల్ బెచారా' షూటింగ్ ప్రారంభమైనా, విడుదల ఇప్పటికి కుదిరింది. కరోనా ప్రభావంతో థియేటర్లకు బదులు ఓటీటీ(డిస్నీ ప్లస్ హాట్స్టార్)లో జులై 24 నుంచి స్ట్రీమింగ్ కానుంది. ఈ యాప్ ఉన్న ప్రతిఒక్కరూ ఉచితంగా వీక్షించే సదుపాయం కల్పించారు.
అయితే ఇటీవలే విడుదలైన ట్రైలర్.. పలు రికార్డుల్ని సృష్టించింది. వచ్చిన 24 గంటల్లోనే(దాదాపు 4.2 మిలియన్) ప్రపంచంలోనే అత్యధిక లైకులు దక్కించుకున్న తొలి సినిమా ప్రచార చిత్రంగా అరుదైన ఘనత సాధించింది. ఇంతకు ముందు హాలీవుడ్లో అవెంజర్స్: ఇన్ఫినిటీ వార్, అవెంజర్స్: ఎండ్గేమ్ పేరిట లైకుల రికార్డు ఉండేది. కానీ సుశాంత్ చివరి సినిమా వాటిన్నింటిని అధిగమించింది. ఈ కథనం రాసే సమయానికి 9.4 మిలియన్లుకు పైగా లైకులతో ఉంది 'దిల్ బెచారా' ట్రైలర్.
సినిమాపై భారీగానే అంచనాలు
గతంలో టీమ్ఇండియా స్టార్ క్రికెటర్, మాజీ కెప్టెన్ ధోనీ బయోపిక్ తీస్తున్న సమయంలో అందులో ఎవరు నటిస్తున్నారు? మహీ పాత్ర చేసే నటుడు ఎలా చేస్తాడా? అని అభిమానుల్లో సందేహం ఉండేది. వాటన్నింటినీ పటాపంచలు చేస్తూ అద్భుతంగా ధోనీ పాత్రను పండించాడు సుశాంత్. సినిమా విడుదల తర్వాత సినీ వీక్షకులతో పాటు క్రికెట్ ప్రేమికులు.. తమ మదిలో ఇతడికి స్థానం కల్పించారంటేనే అర్ధం చేసుకోవచ్చు. అంతకు ముందు బాలీవుడ్లో సుశాంత్ సినిమాలు చేసినా సరే, కేవలం 'ధోని'తో దేశవ్యాప్తంగా గుర్తింపు తెచ్చుకున్నాడు. ఇప్పుడు మళ్లీ 'దిల్ బెచారా'పై అంతకు మించిన అంచనాలు ఏర్పడ్డాయి. ఇది పెద్ద హిట్ అవుతుందనే పూర్తి నమ్మకంతో ఉన్నారు అభిమానులు.
ఆకట్టుకునే కథ
2014లో వచ్చిన హాలీవుడ్ రొమాంటిక్‌ డ్రామా 'ది ఫాల్ట్‌ ఇన్‌ అవర్‌ స్టార్స్‌'కు రీమేక్‌ 'దిల్ బెచారా. ఇద్దరు క్యాన్సర్‌ పేషెంట్ల మధ్య సాగే ప్రేమ కథతో దీనిని తెరకెక్కించారు. సైఫ్‌ అలీ ఖాన్‌ ఇందులో అతిథి పాత్రలో కనిపించనుండటం విశేషం. ఏఆర్‌ రెహమాన్‌ సంగీతమందించగా, ముఖేశ్ చబ్రా దర్శకుడిగా పరిచయమవుతున్నారు.
సీబీఐ దర్యాప్తు కోరుతున్న అభిమానులు
వీటితో పాటే సుశాంత్ మృతి గురించి, బాలీవుడ్లో ఇంకా చర్చ నడుస్తూనే ఉంది. పోస్టుమార్టమ్లో అతడిది ఆత్మహత్య అనే తేలినప్పటికీ.. అభిమానులు, పలువురు నటీనటులు మాత్రం ఇండస్ట్రీలోని నెపోటిజమ్ సుశాంత్ మృతికి కారణమని అంటున్నారు. అతడికి సినిమా అవకాశాలు రాకుండా చేసి, ఒత్తిడికి గురిచేశారని అందుకే ఇలా చేసుకోవాల్సి వచ్చిందని ఆరోపిస్తున్నారు. ఈ విషయమై సీబీఐ దర్యాప్తు చేయించాలని కోరుతున్నారు.
అయితే ఇప్పటికే ఈ కేసుతో సంబంధముందనే ఆరోపణల నేపథ్యంలో సుశాంత్ కుటుంబ సభ్యులు, స్నేహితులు, పలువురు సినీ ప్రముఖల్ని పోలీసులు ప్రశ్నించారు. వారి నుంచి స్టేట్మెంట్స్ తీసుకున్నారు.
- " class="align-text-top noRightClick twitterSection" data="">
- " class="align-text-top noRightClick twitterSection" data="">
