కొవిడ్-19 మహమ్మారిపై యుద్ధంలో రాత్రి పగలు తేడాలేకుండా కష్టపడుతోన్న ఆరోగ్య సిబ్బందిని సన్మానించేందుకు.. గ్లోబల్ ఈవెంట్ను నిర్వహించనున్నారు. పాప్ స్టార్ లేడీ గాగా నిర్వహిస్తోన్న గ్లోబల్ టెలివిజన్ అండ్ స్ట్రీమింగ్ స్పెషల్లో బాలీవుడ్ ప్రముఖులు, డాన్ జోడీ.. ప్రియాంక చోప్రా, షారుక్ ఖాన్ పాల్గొననున్నారు.
ప్రపంచ ఆరోగ్య సంస్థ(డబ్ల్యూహెచ్ఓ), అంతర్జాతీయ న్యాయవాద సంస్థ గ్లోబల్ సిటిజెన్ నిర్వహించిన 'వన్ వరల్డ్ టుగెదర్ ఎట్ హోమ్' కార్యక్రమం ఈనెల 18న ప్రసారం కానుంది. దీని ద్వారా మహమ్మారి నివారణకు తీవ్రంగా శ్రమిస్తున్న వైద్యులు, నర్సులు, కార్మికులు వారి కుటుంబాల నిజ జీవితాలను ప్రదర్శించనున్నారు.
షారుక్, ప్రియాంకతో పాటు
ఈ ఈవెంట్లో షారుక్, ప్రియాంక చోప్రాతో పాటు అలానిస్ మోరిసెట్, బిల్లీ ఎలిశ్, గ్రీన్ డేకి చెందిన బిల్లీ జో ఆర్మ్స్ట్రాంగ్, క్రిస్ మార్టిన్, డేవిడ్ బెక్హాం, ఎల్టన్ జాన్, ఇడ్రిస్, సబ్రినా ఎల్బా, జాన్ లెజెండ్, కెర్రీ వాషింగ్టన్, లాంగ్ లాంగ్, లిజ్జో, పాల్ మాక్కార్ట్నీ, స్టీవీ వండర్ ఉండనున్నారు.
'ది టునైట్ షో' లో
ఈ కార్యక్రమాన్ని ' ది టు నైట్ షో'కు చెందిన జిమ్మీ ఫాలన్, 'జిమ్మీ కిమ్మెల్ లైవ్'కు చెందిన జిమ్మీ కిమ్మెల్.. 'ది లేట్ షో విత్ స్టీఫెన్ కోల్బర్ట్'కు చెందిన స్టీఫెన్ కోల్బర్ట్ నిర్వహించారు.
ఈ నేపథ్యంలో వైరస్ వ్యాప్తిని అరికట్టేందుకు, ప్రపంచంపై సామాజిక, ఆర్థిక ప్రభావాలను తగ్గించడానికి, భవిష్యత్తులో ప్రపంచ లక్ష్యాలను ముందుకు తీసుకెళ్లేందుకు అందరూ కలిసి పనిచేస్తున్నందుకు గర్వంగా ఉందని యూఎన్ సెక్రటరీ తెలిపారు.
”సమాజం ఆరోగ్యం కోసం తీవ్రంగా కృషి చేస్తున్న కార్యకర్తలను గౌరవిస్తూ వారికి మద్దతు ఇస్తున్నాం. కొవిడ్ -19ను అరికట్టేందుకు ప్రపంచ పోరాటానికి చేయూతనిచ్చి ఐక్యత చాటుదాం.”
-- హ్యూ ఎవాన్స్, గ్లోబల్ సిటిజన్ సహ వ్యవస్థాపకుడు, సీఈఓ
ఆన్లైన్లో ప్రసారం
ఈ ప్రత్యేక కార్యక్రమాన్ని అలీబాబా, అమెజాన్ ప్రైమ్ వీడియో, ఆపిల్, ఫేస్‌బుక్, ఇన్‌స్టాగ్రామ్‌లతో పాటు పలు గ్లోబల్ ప్లాట్‌ఫామ్‌లలో ఆన్లైన్లో ప్రసారం చేస్తారు.
ఇదీ చదవండి: కరోనా తీవ్రత తగ్గిన వెంటనే #ప్రభాస్20 అప్డేట్స్
