ఒకనెలలో రెండు రోజుల వ్యవధిలో ఒకే హీరో నటించిన చిత్రాలను విడుదల చేయడం దురదృష్టకరమని బాలీవుడ్ నిర్మాత బోనీ కపూర్ అన్నారు. ఆయన నిర్మాణంలో అజయ్ దేవ్గణ్ నటించిన మైదాన్ చిత్రం విడుదలకు రెండు రోజుల ముందే రాజమౌళి తెరకెక్కిస్తున్న ఆర్ఆర్ఆర్ విడుదలవడం పట్ల అసహనం వ్యక్తం చేశారు. ఇటీవల ఓ ఆంగ్ల పత్రికకు ఇచ్చిన ఇంటర్వ్యూలో దర్శకుడు రాజమౌళిపై ఆగ్రహం వ్యక్తంచేశారు.
'అనైతిక చర్య..'
" 'ఆర్ఆర్ఆర్'లో అజయ్‌దేవ్‌గణ్‌ కీలకపాత్ర పోషిస్తున్నారు. నేను నిర్మాతగా వ్యవహరిస్తున్న 'మైదాన్'లో అజయ్ ప్రధాన పాత్రలో నటిస్తున్నారు. ఈ చిత్రాన్ని గతేడాదిలోనే విడుదల చేయాలనుకున్నాం. అయితే కరోనా కారణంగా షూటింగ్‌ నిలిచిపోయింది. సినిమా కోసం మేం అనుకున్న దానికంటే భారీగానే ఖర్చుపెట్టాం. ఈ ఏడాదిలో చిత్రీకరణ తిరిగి ప్రారంభించిన సమయంలోనే అక్టోబర్‌ 15న 'మైదాన్' విడుదల చేస్తామని ప్రకటించాం. మా సినిమా విడుదల తేదీని ప్రకటించిన కొన్ని రోజులకే 'ఆర్ఆర్ఆర్'ని అక్టోబర్‌ 13న విడుదల చేస్తున్నట్లు రాజమౌళి, చిత్రబృందం తెలిపింది. ఒకే హీరోకు చెందిన రెండు భారీ ప్రాజెక్ట్‌లు కేవలం రెండు రోజుల తేడాతో విడుదల కావడం దురదృష్టకరం. ఇది అనైతికమైన చర్య" అని బోనీ కపూర్ అన్నారు.
'రాజమౌళి మాట నమ్మాలనుకోవడం లేదు'
"విడుదల తేదీల విషయమై ఇటీవల నేను రాజమౌళితో ఫోన్‌లో మాట్లాడాను. విడుదల తేదీతో తనకు సంబంధం లేదని.. అది నిర్మాతల ఇష్టప్రకారం జరిగిందని ఆయన నాతో చెప్పారు. కానీ, ఆయన మాటల్ని నేను నమ్మాలనుకోవడం లేదు. నాకు తెలిసి 'ఆర్ఆర్ఆర్' విడుదల గురించి అజయ్‌కు కూడా ముందుగా సమాచారం ఇచ్చారనుకోవడం లేదు. ఇండస్ట్రీలో మంచి పేరున్న రాజమౌళి నుంచి నేను ఇలాంటి చర్య ఊహించలేదు" అని బోనీకపూర్‌ చెప్పారు.
