బాలీవుడ్ హీరో సుశాంత్ సింగ్ రాజ్పుత్ ఆత్మహత్య కేసు దర్యాప్తులో భాగంగా నటుడి ప్రియురాలు రియా చక్రవర్తిని మంగళవారం ఈడీ మరోసారి విచారణకు ఆదేశించినట్లు వార్తలు వినిపించాయి. అయితే, అందులో వాస్తవం లేదని రియా తరఫున న్యాయవాది మానిషిండె స్పష్టం చేశారు.
కాగా సుశాంత్ మృతిపై కొనసాగుతున్న దర్యాప్తులో బాగంగా.. రియాతో సహా ఆమె కుటుంబ సభ్యులకు సీబీఐ సమన్లు జారీ చేసినట్లు సమాచారం.
సోమవారం జరిగిన దర్యాప్తులో జూన్ 8న సుశాంత్ ఫ్లాట్ నుంచి తను వెళ్లిపోవడం, అతనికి అందించిన వైద్య చికిత్స, మందులతో సహా పలు అంశాలపై సీబీఐ రియాను ప్రశ్నించింది. సుమారు 9 గంటల పాటు ఈ విచారణ సాగింది.
జూన్ 14న ముంబయిలోని తన నివాసంలో సుశాంత్ ఆత్మహత్య చేసుకున్నాడు. తన కుమారుడి మృతిపై అనుమానాలు వ్యక్తం చేస్తూ కేకే సింగ్.. రియా కుటుంబ సభ్యులతో సహా పలువురిపై బిహార్ పోలీసు స్టేషన్లో ఫిర్యాదు చేశారు. ప్రస్తుతం ఈ కేసుపై సీబీఐ విచారణ చేపట్టింది.
