బాలీవుడ్ హీరో సుశాంత్ సింగ్ రాజ్పుత్ ఆత్మహత్య కేసులో డ్రగ్స్ కోణంపై ఎన్సీబీ దర్యాప్తును మరింత ముమ్మరం చేసింది. ఈ కేసులో నటి రియా చక్రవర్తిని అరెస్టు చేసిన అధికారులు ఆమెను విచారిస్తున్నారు. ఈ సందర్భంగా ఆమె కొందరు సినీ ప్రముఖుల పేర్లు చెప్పినట్టు ఎన్సీబీ అధికారులు సోమవారం వెల్లడించారు. ఆమె దర్యాప్తులో సినీతారలు సారా అలీఖాన్‌, రకుల్‌ప్రీత్‌ సింగ్, డిజైనర్ సిమోనె ఖంబట్టాల పేర్లు బయటకు వచ్చినట్లు ఎన్సీబీ డిప్యూటీ డైరెక్టర్ కేపీఎస్ మల్హోత్రా తెలిపారు. అయితే, వారెవరికీ ఇప్పటివరకైతే ఎలాంటి సమన్లూ పంపలేదని తెలిపారు.
కాగా 25 మంది బాలీవుడ్ తారలతో జాబితా తయారు చేశారా? అని ఆయన్ను విలేకర్లు ప్రశ్నించగా.. లేదు అని చెప్పినట్లు సమాచారం. ఎన్సీబీ రియాను విచారిస్తోందని ఆయన తెలిపారు. వారి పాత్ర ఎంత వరకు ఉందనేది మాత్రం వెల్లడించలేదు.
ఈ కేసులో అధికారులు శనివారం ముంబయి, గోవాలలో పలు చోట్ల సోదాలు నిర్వహించి మరో ఆరుగురిని అరెస్టు చేశారు. తాజా అరెస్టులతో ఈ కేసులో ఇప్పటివరకు రియా సహా 16మందిని అరెస్టు చేశారు. ఇప్పటికే ఈ కేసులో అరెస్టయిన రియా చక్రవర్తి, ఆమె సోదరుడు షోవిక్‌కు న్యాయస్థానం శుక్రవారం ఈ నెల 22 వరకు జ్యుడిషియల్‌ రిమాండ్‌కు ఆదేశించింది.
