బాలీవుడ్ నటుడు సుశాంత్ సింగ్ రాజ్పుత్ మేనేజర్ దిశా సలియన్ మృతదేహాన్ని నగ్నంగా గుర్తించినట్లు ఇటీవలే మీడియాలో వచ్చిన వార్తలను ముంబయి పోలీసులు ఖండించారు. అవన్నీ అవాస్తవమని డిప్యూటీ కమిషనర్ విశాల్ ఠాకూర్ స్పష్టం చేశారు. ఘటన జరిగిన వెంటనే పోలీసులు ఆ ప్రదేశానికి చేరుకున్నారని.. ఆమె తల్లిదండ్రుల సమక్షంలోనే మృతదేహానికి పంచనామా చేసినట్లు వెల్లడించారు.
జూన్ 8న రాత్రి మలాద్లోని ఓ భవనంపై నుంచి దూకి దిశ ఆత్మహత్య చేసుకుంది. సరిగ్గా ఐదు రోజుల తర్వాత సుశాంత్ ముంబయిలోని తన నివాసంలో ఉరి వేసుకొని చనిపోయాడు. ఈ రెండు ఘటనలు బాలీవుడ్ సహా రాజకీయంగా తీవ్ర చర్చనీయాశంగా మారాయి.
రెండు వేర్వేరు ఘటనలను కొంత మంది నాయకులు రాజకీయ లాభం కోసం ఉపయోగిస్తున్నారని శివసేన పార్టీ ఎంపీ సంజయ్ రౌత్ ఆరోపించారు. ఇప్పటికే తమ కుమార్తె మృతిపై వస్తున్న వార్తల్లో వాస్తవం లేదని దిశ కుటుంబం స్పష్టం చేసింది. ముంబయి పోలీసులు చాలా నిజాయతీగా పని చేస్తున్నారని.. తమను అపఖ్యాతిపాలు చేయాలని చూడటం బాధ కలిగించిందని పేర్కొన్నారు.
