విలువల నిలయం 'అమరచిత్ర కథ' కేంద్రం

"మూలాలను అన్వేషిస్తూ సాగుతోన్న మానవాళి ప్రయాణం.. అమరచిత్ర కథలతో సరికొత్త అధ్యాయానికి శ్రీకారం చుడుతోంది" అని హీరో రానా అన్నాడు. హైదరాబాద్​లో 'అమరచిత్ర కథ' పేరుతో ప్రత్యేక కేంద్రాన్ని ప్రారంభించాడు.

హైదరాబాద్​లో 'అమరచిత్ర కథ' పేరుతో ప్రత్యేక కేంద్రాన్ని ప్రారంభించాడు టాలీవుడ్ హీరో రానా. కథల పుస్తకాల్లోని విజ్ఞానాన్ని, వినోదాన్ని, సాహిత్య విలువలను భావితరాలకు అందించాలనే ఉద్దేశంతో ఏర్పాటు చేసినట్టు ఆయన తెలిపాడు. మూలాలను అన్వేషిస్తూ సాగుతోన్న మానవాళి ప్రయాణం, సరికొత్త అధ్యాయానికి శ్రీకారం చుడుతోందని సంతోషం వ్యక్తం చేశాడు.

"పాతికేళ్ల కిందట మా అమ్మ ఇచ్చిన అమరచిత్ర కథ పుస్తకాలు.. నేను ఎంపిక చేసుకునే కథల పట్ల అవగాహన పెంచాయి. దర్శకుడు రాజమౌళికి అమరచిత్ర కథలంటే ఇష్టం. ప్రస్తుతం ఆయన నిజ జీవిత పాత్రలతో కల్పిత కథ 'ఆర్.ఆర్.ఆర్' తీస్తున్నాడు. ఆ సినిమా కోసం నేనూ ఎదురు చూస్తున్నాను" -- రానా దగ్గుబాటి, హీరో

మానవ ప్రగతికి అవసరమైన అన్ని విభాగాల్లోనూ శిక్షణ పొందేలా 45 కోర్సులతో ఈ కేంద్రాన్ని తీర్చిదిద్దినట్టు రానా చెప్పాడు. ఏడాదిపాటు శిక్షణ కార్యక్రమాలు కొనసాగుతాయని పేర్కొన్నాడు. పిల్లల నుంచి వృద్ధుల వరకు అందరికి ఉపయోగపడేలా తీర్చిదిద్దినట్టు చెప్పాడు.